MZP Headquarters Zawlnuam Press Release

Press Release

MZP Headquarters Zawlnuam chuan March ni 2-a MZP General Headquarters Aizawl ten Zawlnuam P/S - III chungchanga an thuchhuah, Zawlnuam VEC Secretary leh MPTA President in March ni 7&8 an chhan danah MZP Zawlnuam Hqrs. chu a lungawi lo hle a. Thu chiang zawk leh belhchian dawl zawk mipui hnenah a tarlang duh a ni.

VEC Secretary thuchhuah hi VEC Chairman leh MPTA member te pawn an hriatpui lova, H.Rochharliana hi a mimalin MZP chuan a haw lova. A mah hi PS III-a zirtirtu hnathawk mek a ni a. Chuvangin a thuchhuah hi thu belhchian dawl ni ah Zawlnuam MZP chuan a ngai lo a ni..

P/S - III School hmun hi Thuampui veng a awm a ni a. An School hmun hi YMA Information Centre sak mek nena P/S - III Headmaster in inthleng dilin Dt.9. 2. 09 ah YMA te nen chuan an inthleng a. Hei hi Kawrthah SDEO Pu K.Lalnunfela hnuaia a awmlai a ni a. A hnu lawkah SDEO rawn kal chuan a hriatpui loh a ram lo inthleng chu cancelled order a chhuah nghal a, mahse a hnuah thu awmzia sawiin February ni 9. 2009 ah chuan ram inthlengna chu YMA te nen chuan ziah fel a ni ta a. Education danah ram inthleng theih a ni lova, ram inthleng tawp lovin inhawh thleng zawnga kalpui a ni a. Kum 99 chhung atana inremna an ziak ta a ni.

An School hmun nena an inthleng pui hi YMA te hian Concrete- in a slap- chhun zawh sa a ni tawh a. MZP te chuan YMA khawih bak hi sak zawm chho mai turah a ngai a. Mahse an sak zawm thei ta silova. Tichuan, School chu Community Hall sak mek la zawh fel lohah chuan ni 13 chhung YMA hnenah School kal nana hman an dila, an dil ang hian rem tihsak an ni a. Ni 13 mai nilovin kumtluan mai chuan School atan an hmang chhunzawm ta a ni. MZP chuan an School Building thara Class kal vat turah a ngaia, mahse kumin 2010 thleng mai pawh a sak chhunzawm a nih tak loh avang leh YMA ten Community Hall sak zawm an duh tawh si avangin chhuak turin an ti ta a, loh theihlohin an chhuah a ngai ta a, School kalna mumal nei ta lo chuan an zirtirtute ‘In theuah’ mumal lo takin Class chu an kal chhunzawm a. A tir atanga School kal ni a an rawn sawi hi tu emaw hlauh vanga rawn sawi niah MZP chuan a ngai a. Kan zirlai puite dikna humhim tur hian MZP te chu a inpeih reng a ni.

Tin, Mid - Day Meal chungchang pawh hi regular taka ti lovin run dalah tiin an kalpui ve zeuh zeuh chauh niin Zirlai nu leh pa te hnen atangin thu MZP chuan a dawng a. Hemi chungchangah hian an zirtirtute in theuh a class hran te te a kal an nih avang hian regular taka kalpui erawh a har pawh a ni mai thei a ni.

An fate School kalna mumal nei lo leh School kai mumal lo chu zirlai nu leh pa thenkhatin tha ti lovin an fate chu P/S - III atanga la chhuakin P/S - II ah School mumal zawka an kal theih nan tiin sawnchhuah an tum a, P/S - III Headmaster-in Transfer Certificate a lo pechhuak duh lo leh zelte hi zirlai naupangte dikna rahbehna ah MZP chuan a ngai lo thei lo a ni. Transfer Certificate pe chhuak duh lo mahse nu leh pa thahnemngai zualte chuan mumal lo taka School kal anih tak si avangin P/S - II ah chuan an kaltir ta tho a, hei hi P/S - III zirtirtuten hrethiam lovin an inchhunga kal chilhin an lehkhabu SSA atanga an dawn zawng zawng, Pen leh Pencil thlengin an chhuhsak bawk a ni.

Heng zawng zawngah hian zirlai nu leh pa, zirtirtute leh zirlai naupangte MZP chuan thiam loh a chantir lova, an thiam loh pawh a nilova, hetianga awmtirtu Education Deptt. hian a rang thei ang bera an School Building sak zawmna tur tuna Education Directorate a tang mek pekchhuah mai theih Rs 2,50,000 (Nuaihnih Singnga) leh duhthusam ang zana he Building sak zawh a nih theih nana sum dang ngaihtuah vat turin MZP chuan a phut a ni.

Ni 10/3/2010 atang khan BRC Building ruakah partition atana puan zar chawpin pawl 2 atanga pawl 4 chu tawt taka vawm luh chawpchilh an ni a. Pawl 1 zirlai leng velote chu an Head Teacher Inah kal tura ruahmanna chawpchilh taka siam zui a ni.

Zirlaite harsatna hrethiam a mahni insawi thiam mai lovin zirlaite’n zirna tha taka an chhunzawm theihna tura hma la turin MZP Headquarters Zawlnuam chuan thuneitute leh mawhphurtute a ngen tak zet a ni.








(RALTHANSANGA)
Secretary
MZP Headquarters Zawlnuam

MZP Press Release 16th March 2010

MZP chuan CBSE hnuaia Class XII exam kalpui mekah Major Indian Language (MIL)-a Mizo Subject Question set-ah syllabus hlui a mi set tel a ni chu pawi a tiin hetianga question set sual hi a dem tak zet a ni.

Dt 15th March 2010 khan he subject hi exam a ni a, Mizo subject hi nikum december thla-a syllabus thlak a ni tawh a, kum hmasa a a syllabus entu chu Mawmrang-a thlak a ni a, question ah hian syllabus hlui a mi athar a tel tawhloh chu mark 12 pu zet set tel a ni. He thil avang hian India ram a mi nilo Middle East thlenga CBSE syllabus hmangtu mizo naupangten an tuar nasa hle dawn a, hei hi thalo a tiin, hemi chungchanga mawh phurtu chhuichhuaka, atul anga bawhzui ngei MZP chuan a duhin hetiang hi a thlen nawn tawhloh na turin sawiselna leh demna lehkha pawh Regional Officer, CBSE, Guwahati hnenah MZP chuan a thlen nghal a ni.





Sd/-
(LALSANGZUALA NGENTE)
General Secretary

MZP Press Release 15th March 2010

Champhai District SSA Office-a thawk tur Inclusive Education (I.E) Co-Ordinator hmunruak luahkhat tura hna lak chungchangah MZP chuan thil fello a awm niin a hria a. Hemi chungchanga hma la tur leh chhuichiang turin Education Minister hnenah ngenna a thlen tawh a ni.

Inclusive Education (I.E) Co-Ordination hnathawk tur hian Essential Qualification-ah Graduate with Diploma in Disability Certificate emaw Multi Category Training neih a ngai a. Amaherawhchu, he hna thawk tura lak hian heng Certificate te hi a nei lova. Tin, District Project Office leh Sub- Division Education Office te pawh in ziakin Un-Qualified a nih thu hi SPD Office-ah pawh an thehlut tawh a ni. Hetih laia a tling zawk la lova, a tling lo zawk lak a ni ta mai hi MZP chuan a hrethiam lo tak zet a, a tul angin thuneitu te’n chhui chiangin hma la thuai se a duh takzet a ni. Mizoram Sorkarin Ram thuvawn a kalpui mek “ Rorelna dik chu lui angin luang sela, felna chu luipui kang ngailo angin luang rawh se” tih chu a taka kalpui a nih zel MZP chuan a duh tak meuh a ni.



Sd/-

(PETER CHHANGTE)
Secretary i/c Publicity

MZP Press Release 15th March 2010

Champhai District SSA Office-a thawk tur Inclusive Education (I.E) Co-Ordinator hmunruak luahkhat tura hna lak chungchangah MZP chuan thil fello a awm niin a hria a. Hemi chungchanga hma la tur leh chhuichiang turin Education Minister hnenah ngenna a thlen tawh a ni.

Inclusive Education (I.E) Co-Ordination hnathawk tur hian Essential Qualification-ah Graduate with Diploma in Disability Certificate emaw Multi Category Training neih a ngai a. Amaherawhchu, he hna thawk tura lak hian heng Certificate te hi a nei lova. Tin, District Project Office leh Sub- Division Education Office te pawh in ziakin Un-Qualified a nih thu hi SPD Office-ah pawh an thehlut tawh a ni. Hetih laia a tling zawk la lova, a tling lo zawk lak a ni ta mai hi MZP chuan a hrethiam lo tak zet a, a tul angin thuneitu te’n chhui chiangin hma la thuai se a duh takzet a ni. Mizoram Sorkarin Ram thuvawn a kalpui mek “ Rorelna dik chu lui angin luang sela, felna chu luipui kang ngailo angin luang rawh se” tih chu a taka kalpui a nih zel MZP chuan a duh tak meuh a ni.



Sd/-

(PETER CHHANGTE)
Secretary i/c Publicity

Press Release 10th March 2010

MZP chuan Zohnahthlak te hmun hrang hrangah awmin kan chenna ram inrelbawlna dan te hran mahse thinlunga inpumkhatna turin theihtawpin hma a la chhunzawm zel a, chumi kawnga hmalakna ti chak lehzual tura Mizoram Sorkar zahawm tak a Minister Pu Lalrinliana Sailo thiltih chu lawmawm a tiin a chhuang tak zet a ni.

MZP in ruahmanna alo duan lawk angin Chittagong-a(Bangladesh) kan Mizo zirlaite chuan kan Minister hi lo hmuak in an lo lawm a. Minister hian Bangladesh leh India insumdawn tawnna tur hian hmala in Dhaka, Chittagong leh Cox bazar thleng tlawhchhuakin heng a kalna ah te hian Zohnahthlak te zawnchhuah leh an thlavang hauh hna a thawk tih hriat a ni a, Chittagong-a Zohnahthlak unau ten an awmna hmun a Sorkar hna an thawh phak a an thawh theihloh chungchangah pawh Chittagong ‘Mayor’ hnen ah sawisak in kan unau khawi hmun a cheng pawh nise kan theihnghilh theihlo anih thu a tarlang bawk.

Tin, ‘Mayor’ bulah hian Zohnahthlak unaute hi sawipuiin an harsatna hrang hrangah hawisan lova pui zel turin a ngen sak bawk a, Mizoram Chief Minister- in Zofate inpumkhatna kawnga a duhdan bawhzuia kan Minister zahawm takin Zofate tana a thawk hi MZP chuan lawmawm a tiin entawntlak a ti hle a ni.

MZP chuan khawi hmunah pawh chengin eizawnna kawng hrang hrangte zawh thin mah ila unau kan nihna hi vawng nung zel turin Mizo mipui zawng zawng a chah tel bawk a ni.



Sd/-
(LALSANGZUALA NGENTE)
Asst . General Secretary

MZP News

MZP chuan vawiin tlai dar 3 khan Pisa Puiah Zoram Ni 5th March 2010 puala Lemziak Intihsiak a buatsaih result puanna a hmanga, he hun hi Pu Lalnunnema Ralte, Fin. Secy-in kaihruaiin, Pu V.L.Krosshnehzova, President-in thuchah tawi a sawi a. Zoram Ni puala Lemziak Intihsiak chu thangtharte hnena kan pi leh pute tawrhna rapthlak tak hriat thar leh na tura buatsaih a nih thu sawiin, 'kan hnam nuna thilthleng hriatreng leh chumi hmanga rilru thar leh beiseina sang zawk, tumruhna neih hi thangtharte mawh lian tak a ni', a ti. He thil buatsaih a nihchhan hriatfiah tawkloh avanga harsatna siam a nih kawngah 'an thil hriat chian tawk lohna hi hriatfiah hun an la neih ngei kan beisei tlat' a ti bawk.
He hunah hian Lalsangzuala Ngente AGS-in report pe in lawmman sem a kaihruai a, lawmman dawngtute chu:-
Primary- 1na P.C.Ramnunsanga, Class IV, 2 na Lalsiamthanga, Class III, 3na Emanuel Lalrinhlua, Class II. Middle-ah 1na Lalmalsawma, Cl-VII, 2na Lalruatkimi Cl-V, 3na Lalduhsanga, Cl-VII leh HVL Tanpuia, Cl-V. High School-ah 1na Lalruatpuia, Cl -X, 2na Laldintluanga, Cl-X, 3na Vanlalruata, Cl-X, HSS-ah 1na Zoramsangkima, Cl-XI. Heng bakah hian lemziak thehlut zawng zawngte hnenah Participation Prize Certificate leh thildang pek vek an ni. He huna Lawmman la remchanglote hian MZP Pisa Puiah a lam theih reng a ni.
Lawmman ah hian Citation mawi tak, tangka fai, Zawlkhawpui sen mei channi lehkhabu leh Zofest 2009 Souvenir 'Chibai' bakah Zoram Map leh MZP Calendarte pek tel an ni. Hengte hi MZP Adviser thenkhat leh hruaitu Seniorten an sem a ni. Lawmthu sawiin Pu H. Lalremsiama, GS in hun a khar a ni.

MZP Press Release Dt 8th March 2010

MZP chuan Aizawl khawpui chhunga Zirna In hrang hrang a tlawhchhuah chungchang leh a thil hmuhchhuah te bawhzuiin tihhlawhtlin a nihna turin Sorkarah a thlen nghal a ni.

1) School hrang hrang admission fee inkhairuallo lutuk in zirlaite ah harsatna a thlen thin angin dan fel fai tak Government/Deficit & Private School te tana zawm tur siam nise.

2) Elementary School tan buhfai leh hmanrua thidang te School a thlen theihna turin sum dah a nilova, Go-down atang hian zirtirtu ten anmahni sum sengin leh zirlaite pawh hemi thiar hian an hnatlang thin a. School Grant atang ten buhfai thiar nan hian sum hman thin a ni. Hei hian School thuamthat na tur hial pawh a tawrh phah thin. Mid-day Meal hmanrua leh buhfai te hi School thlenga a thlen theih nan Project ah te telha hmalak nise.

3) Zirlai naupang tam zawk ten intih tunlai nan Mobile phone School- a ken an intihhmuh hle a. Hei hian zirlai pawh ngaihsak lova buaipui an awm thin tih hmuhchhuah a ni. Nun khawlohna tam tak naupangten an chhar chhuzawm lohnan State dangah Zirna In chhunga Mobile phone ken luh an khap angin Zirna In hungchhunga ken luh khapna dan fel tak siam nise.

, Zirlai tam tak ten intih tunlai nan an taksa khawilai emawah ‘Tatoo’ chhut anin tihhmuh a ni tih hmuhchhuah a ni bawk a. Hemi hi tunlai fashion thalo tak, taksa hriselna thleng pawha nghawng thei anih avang leh eizawnna kawng zawhnaah pawh harsatna thlen thei anih avangin zirlaiten an tih tawhlohna tura khapna dan tha leh fel fai tak siam.

4) Zirlai naupangte ah Zonunzemawi nasa takin a kiam hret hret a ni tih hmuhchhuah a ni a, hnam tam takte’n Mizo nuna an awh em em thin tlawmngaihnate, aia upa zahnate, Mizonate, etc hi nasa zawka Zirna In a zirtir thar leh turin ruahmanna siam nise.

5) International Convention on the Child Right Juvenile Justice Care and Protection of Children Act 2000 and its amendment 2006 beh chhan a mahni chanvo hriatna kawngah hma kan sawn zel a. Hei hian naupang thuawihlo chunga hremna pek kawngah harsatna awm fo tih hriat a ni. School tinah Child Right-hi ngun taka zirchian a, zirlaite an zirna kawnga an that pui theih ang tura displine kenkawh a nih theih nan hma lak nise.

6) School tinah zirlaite tui thianghlim hnianghnar taka an hmuh theihnan turin hmalak nise.

7) Mathematics hi Technical Subject anih avangin zirtirtu nazawngin naupangte an zirtir thei lova. School thenkhatah zirtirtu an neihloh avangin zirlai nu leh pate remtihna in zirlaiten pawisa an thawh khawm thin tih hmuhchhuah ni. Hemi chungchang hi chhuichiang a zirtirtu neih loh avanga naupangte’n sum an thawh khawm tawhlohna tura hmalak nise.

8) Zirlaite incheina (Uniform) mawi lo tak tak hmuh tur a tam hle a, hmeichhe pawnfen chhing tak tak leh mipa naupang kekawr hafual lutuk leh sam hnim lutuk hian inthununna (decipline) a ti chhe thui hle. Dan fel fai tak leh inkhairual zawk siam nise.

9) Deficit School hrang hrangte hi Mizoram zirna hmel timawitu berte zing a mi an ni a, hetih lai hian ngaihthah deuh ni a hriat a ni. School thenkhatah chuan Sawrkar atanga an hlawh pek ang hi pe kim lovin ‘cut’ then sak a awm tih hmuhchhuah a ni a, enfel a hmalak nise.

10) HSLC leh HSSLC Practical Exam neih thinah External duty ten mark an pe thin a, Duty te hian an School duhsak bikna leh hleihneihna a awm tih hmuhchhuah a ni a, enfiaha hmalak nise.

11) HSLC leh HSSLC Exam Centre School te hi School thuhmun anni tlangpui a, Exam Centre School- a exam ve lo (Cl-VIII, IX & XI) naupangte hi an chawlrei thin em em a, zirna hun an nei tlemin an course an zawh loh phah thinin, an zirlaiah an hnufum phah tih hmuhchhuah a ni. Ruahmanna tha zawk siam tawh nise

12) Mizorama CBSE Compartmental Exam Centre la awm lo chu, zirlaite tan State danga Exam- angai thin a. Mizorama a awm theihnan hmalak nise.

Mizoram Sorkara a thu thlen hrang hrang hi Education Minister chuan lo enfiaha a tul anga hmalak a tum thu hruaitute hnenah hian a sawi a, MZP pawhin a tul dan ang zelin bawhzui a tum bawk a ni.


Sd/-
(LALSANGZUALA NGENTE)
Asst. Gen. Secretary,

Zoram Ni 5. March 2010-a MZP President thusawi

Zoram Ni 5. March 2010-a MZP President thusawi.
Pu Chairman leh MZP-a ka thawhpui duhtakte, NESO-a kan chairman zahawm tak Dr Samujal Battacharya leh a thawhpui AASU Vice President Mr. Jatin Boro leh he hun hmangtu zawng zawngte ZoramNi chibai ka buk a che u. He hun hmang tura in hun hlutak senga in lo thawhchhuahna ah lawmthu ka sawi a ni.
Zoram Ni hmang tura kan inbuatsaihna kawng bumboh tak kara he hun tluang taka kan hmang thei hi a lawmawmin, he hun kan hman dan turah sawi leh selna tam tak a awm a. 'India-in min bomb lo' ti leh ' kan chungah zah an ngai' tihte leh thil dang dangte a leng a. Heng sawinepna hrang hrang avangte hian kum 1966 March ni 5 leh a hnulama Mizote tawrhna kha a nep phah lova, a nat ngaiin Mizote thinlungah ala na reng a ni. 'Min Bomb lo' tih chungchangah kuta kan ken emaw a awmna atanga paih chhuah a hmun a thlen a puak dur, kang ta hluah hluah chu Mizote chuan Bomb kan ti mai. Sawi leh dan tur dang a awm chuanglo a ni.
He ni kan hman chhan hrang hrangte puangzarin sawifiah chamchi mah ila, la hrefuh tawk lova tuna lo telve remchanglote an awm a nih pawhin MZP chuan a dem reng reng lova. A haw zawng phei chuan rilru ala pu chhin lo a ni. Mizote hi in haw tham leh innghirngho tham kan nih loh zia, MZP chuan a chiang a, Inpumkhatna thupuia nei chunga he Ni hi hmang kan ni tih hi kan theihnghilh a remlo a ni.
He Ni kan hman chhan hi thangtharte nunah Hnam rilru nasa zawka tuh kan duh vang a ni pakhat a. Mizona awmzia pawh kan hriat tawh mah nise han tarlan tel ka duh. Kei hi ka in tih Mizo avanga Mizo ka ni lova, min hringtu ka Nu leh Pa Mizo an nih avanga Mizo zawk ka ni. Kan unau tamtakte dinhmun dawnpui lova, an intih Mizo theih loh avanga hmu Mizo theilo tam tak kan zingah kan awm thin. Heng kan unaute hi keini tih Mizo tur nilovin Unau thlahkhat kan nihna avanga Mizo zawk an ni tih hi kan hriat nawn fo a tul a ni.
Mizo-a piang hi Mizo vekin thlankhur kan lut dawn a, he kan dachhung hun tawiteah hian kan ngainat zawngte, kan hlauh zawngte, kan tlawn duh zawngte leh kan inchei duh dante dang thin mahse tumah hian Mizo-a piang a nih chuan a Mizona a kalsan thei lova. Mizo zia leh nunphung erawh an tidal thinin, an tihmingchhe fo thin zawk a ni. Mizo chuan a pianpui Mizo vek a thihpui anga, hnamdang pawhin a pianpui hnam bawk a thihpui dawn a, an kalsan thei bik hek lo a ni. Kan thlahtute atanga kan rochun kan nihna Mizo hi tumahin tlan bosan kan tum a rem lova, kan nihna achiang chungin chawi vul deuh deuh kan tum tur a ni.
Ram leh hnam awmzia kan hriat tawh mah nise tarlan tel teh ka duh. MZP ten Ram kan tih chu he Zoram hi a ni a, hnam kan tih chu Zofate hi kan ni. Zofate chennan Zoram chu buatsaih a ni tih hi kan la ringhlel chhin ngai lova, lungsi taka pawmin chu ram leh hnam humhalh hna chu a theih ang leh phak chinah, inpekna nen tlanchhe lovin MZP chuan a thawk thin a ni.
He Zoram hian a hnute tui - Tlangsang leh kawr ruam, thing leh mau leh hnim hring, boruak thiang tak leh a tuifim hmangin Zofate hi min chawm a. naute-in a ni hnurte tui duhthawh taka a hne thin angin chin tawk awm lek lovin Zofate hian Zpram hnute hi kan hne suau suau a, hnek dak theih tawh loh ang hrimin kan insuamsam chhawk a ni ber mai. Zoram hian engtin tak min ngai ang maw.
Ram chu hnamte tana buatsaih a nih angin, hnam chuan ram tan humhim tura a mawhphurhna a kalsan thiang lova. Ram leh hnam chu sawi hran theih lovin a inzawm tlat a, a hnu a inzawm tawn tih hriatna hmangin rawngbawlhna kan thawh a tul takzet a ni.
Pawl tam tak, abik takin Political Party ten Ram tellovin hnam te min in hmangaihsiak fo va, a chhan chu ram chuan Vote a neih ve loh vang a ni fo thin. Mahse hmangaihna kimlo chuan chu inzawmna chu a pawtphel thei silo. Tunge mahni hringtu Nu leh Pa phatsana, hmusitna nen diriam chunga dingchhuak an awm ngai em? tih chu MZPte zawhna lian tak a ni fo thin. Min hringtu he Zoram hlutzia hre chungih a fate hian a humhinm hna kan thawh a tul.
Ram leh hnam awmzia hre chunga he Ni Zoram Ni hi buatsaih a ni a. Hnam inti ve meuh chuan a nun kawnga thilthleng hriatchian leh chhinchhiah te, ngaihhlut leh chhawr tangkaite, chumi hmanga a hnam hmangaihna rilru thar put chu a tih mak mawh a ni. Mawhphurhna hrelo Mizo nih kan duh a rinawm loh.
Kum 1966, March ni 5 leh a hnulama Zofate tawrhna kha sawisen a ni hau ho - India-in kha tih laia Mizorama a dan hman mek Armed Forces Special Power Act 1958 kal pelin a van lam hmanraw neih that ber ber Jet Fighter Toofani leh Hunter an tih hmangin, a hmelma hlun Pakistan chung pawha ala hman ngai loh in min rawn bomb ul ul maite, Zoram dung leh vang meialh a a chang zote, a lei sipaiten an thuneihna hmang sual a, Mizo nunau tam tak pawng sual a a n nunna an lak sak te, Sakhaw zalenna rama kan Biakin tam tak min rawk sak leh min run sak dan te, bomb leh silai leng avanga pawisawilo tam tak nunna chante, piangsual ramtuileilova awm ta te, buh leh bal kang ral tam takte kha ngaihtuah nawn leh in a na a, tin lung a khei a ni. Chung tawrhna zawng zawng inbelhkhawm chu na tak a ni a, sawi nep ngawt chi a ni lo. Sawi nep tum avanga nep leh tur chuang a awm lo.
Ka Politician te zingah Vai hlauhtlawn Politics a leng nasa em em a, heng hi engnge a chhan kan tih chuan dik leh fel taka rorelna kan ken kawh thin loh vang a ni. Mi dik a dawizep thiang lova, fel lo taka ti thinten hlauhthawn an neih a ngai thin. Zafate hian ngaihdan hran hran neiin, thutna hran hranah thu fer fur mah ila, Mizote dikna chanvo humhalh a, hlenchhuah tumna rilru nghet kan neih a pawimawh. He ni kan hman a vang hian India huat thar a tul hran lova, India erawhin kan nuna thilthleng hi thangtharte hian kan la theihnghilhlo a ni tih hi hria se kan duh. He Ni hman a nih avang hian India hnuaia Zofate dikna chanvo humhalh duhna thinlung pawh nasa takin Zofate rilruah riak nghet tlat se kan duh. India pawhin a khua leh tuia a chhalte chungah thliar hran bik nei lo se, kan dikna hria in Tuikuk leh Chakma chungah pawh ro rel se kan duh takzet.
Pawisawilo nunna chante thihna kha a na kan ti. Vawiin hian kan sun takzet a. Kha tawrhna khan Mizote hi mi thuhnuaia kun reng tur nunah nilovin, dinchhuah duhna thinlung thar min pe se kan va duh em!
Mi thenkhat inti changkang tak, khawvel changkanna in a lem, hnam boral zia zawh mek Mizo zingah kan awm. hei hian India zalenna sualtute'n India ram Pangpar huan an teh khin danman fuh tawk lo tam tak a awm theih a ni tih hei hian a tifiah hle a ni. Mizo nisia vai ziaa par tum tlat te, sap zia changkanna emaw ti tlat, tun hnaiah phei chuan Korean zia mawina emaw ti tlat an awm. Mizo zia hian kan awmna theuhah mawi takin a par theih a, a zahpuiawm lova, dan kalh a ni hek lo. Zonunzemawi hi midang tan a hnawk lova, a chhuanawm hliah hliah zawk a ni. Chu zemawi tak chuan he Ni hmang hian mawi takin par chhuah tum ila, hnam rilru - 'kei ka thawk ang nang lo awl rawh, sem sem dam dam, eibil thi thi'' tih nun te hi a takin chan phah thei ila a van lawmawm dawn em!
A tawp ber atan chuan Ram tana nunna hlantuten an nunna phal taka an hlan te, silaimu kara thi leh hliam buaipuitu ten thih huama an beihna te, khatih laia kan nu leh pa mangangin Pathian chhanhimna tih takzeta an auhna ang khan MZP Gen. Hqrs. chuan thinlung leh tihtakzetin Mizo zawng zawngte he NI hmang hian Inpumkhatna kawng zawh ngei turin a ngen tak meuh meuh a ni.
Mizo, 'Tho la ding ta che, i hliam a dam e'.
Ka lawm e.

Mizo Zirlai Pawl History

Zirlai Pawl (MZP) hi kum 1935 October ni 27 ah din a ni a, he pawl hian khawvela Zo hnahthlakte chenna chin tawh phawt chu a huam a ni.Zohnahthlak zawng zawngte ram leh hnam tana mi chenfakawm ni tura buatsaih leh, ram leh hnam hmasawnna kawnga theihtawpa sorkar tanpui hi a zepui a ni. Party politics tel lova sorkar siamthat nana hnathawh chu a hnapui ber a ni bawk. “Tanrual hi chakna” tih thupuia hmangin Mizo zirlai zawng zawngte zingah inpumkhatna te, an chanvo leh dikna humhalhna te, Zoram leh hnam tana mi tangkai nihna te, kuthnathawh uara chawisan nan te, Mizo hnam nun leh zemawi leh tha apiang humhalh a nih nan te, Mizo hnam chimralna laka hum tur te, eiruk leh hlemhlet dona te, Mizoram leh hnam tluchhe tur venna te, Pi leh Pute atanga Zofate luah chin ram rorelna pakhat hnuaia awm lehna tura chawl lova thawh zel chu a thil tumte a ni.

Pawl chhinchhiahna (emblem)-a nghawngkawlin a phurh hi pipute atanga Zofate luah thin Map niin, hemi chhunga mi hi tuna Mizoram State Map a ni. Rawng sen hian MZP chu ram leh hnam chhan nan huaisen taka thawh a inhuam tih a entir a, nghawngkawl leh favah hian thawhrimna pawimawhzia entirin, lehkhabu hian zirlai pawl a nih a entir bawk..Pawl puanzar chu rawng chi hnih niin, a chanve chunglam var (white) leh a hnuai lam hring (emerald green) a ni a, rawng varah hian a senin MZP emblem ziakin, rawng hringah Mizo Zirlai Pawl a vara ziah a ni. Rawng var hian pawl thianghlim entirin a hring hian pawl nung tih a entir bawk.
A din tirh atanga ram leh hnam tana theihtawp a chhuahnaten hnuhma ropui tak tak hnutchhiahin, Mizoram buai 1966 atang khan duhthusamin a kal chak thei ta lova, kum 1980 bawr chho atang khan Mizoram sorkar nen ngaihdan a inan loh avangin mumal takin a kal thei ta lova. Chuvang chuan zirlai pawl hran thahnem tak a lo piang chho ta a. Harsatna chi hrang hrang avanga a hnathawh ropui tak tak a chawlhsan mek chu din thar a nih leh nan zirlai pawl hrang hrang lo piang chhuak, heng — United Mizo Tribal
Students Union (UMTSU), All Mizo
Students Association (AMSA), Mizo
National Students Joint Action Committee(MINSAC), Students Union Joint Action Committee (SUJAC), All
India Mizo Students Federation (AIMSF) — te chuan an nihna theuh dahthain Mizo zirlai, ram leh hnam hmasawnna duhtute chuan he pawl, MZP ah hian huang khatah lutin Dt. 14.8.1993 atang khan an awmho leh ta a ni.

pawl hi Firm & Society Act hnuaiah No. 35 of 1969-70 a register a ni a. Mizorama pawl hlun ber pawl leh langsar tak, Mizo zirlai zawng zawngte lenna hmun leh Inpui ber a ni.

MZP General Headquarters-ah hian Elected Office Bearers 6 awmin
Appointed Secretary 10 leh Executive Member 50 an awm a. Adviser 8 leh
Legal Adviser 2 awmin Editor, MZP Chanchinbu leh NESO Represent te chu Ex-Officio Committee Member an ni.

Tunah hian MZP hmunpui ber
General Headquarters chu Aizawl niin, Zohnahthlak luah chin ram chhung Churachanpur,Manipur leh Behliangchhip,Tripura-ah te Headquarters neiin Mizoram state chhung, heng — Serchhip, Biate, Champhai, Ratu, Kolasib, Mamit, Zawlnuam, Saitual, Lunglei leh Khawzawl — ahte hian Headquarters a awm a, a vaiin 12 a ni. General Headquarters leh Headquarters hrang hrang hnuaia khaw 41, heng — Hnahthial, Chawngte, Tlabung, Lungsen, Tawipui, Haulawng, Bunghmun, Bairabi, Vairengte, Bilkhawthlir, Thingdawl, Kawnpui,Thenzawl,Chhiahtlang, Chhingchhip,Tlungvel,Khawlailung,N.Vanlaiphai,E. Lungdar,Bungtlang,Hnahlan,Khawbung, Sialhawk,Chawngtlai,Khawhai,Rawpuichhip,W. Phaileng,Seling,N.E.Khawdungsei, Kepran,Sawleng,Vaitin,Rabung, Kawlkulh, Ngopa, Kawrthah, Darlawn, Aibawk, Reilek, Thingsulthliah leh Kanhmun — ahte hian Sub-Headquarters a nei a, hengho hnuaiah hian Branch tam tak a awm bawk.
Mizoram College hrang hrang 31 leh Women Polytechnic, Aizawl leh Lunglei Polytechnic-a Students’ Union theuhte nen inthlunzawmin, henga Vice President leh General Secretary theuhte chu an awmna hmun Hqrs/Sub-Hqrs. ahte Ex-Officio Committee Member an ni a, Mizoram University hnuaia Students Union President leh General Secretary te chu Ex-Officio Committee Member an ni bawk.
Zohnahthlak hnam hrang hrangte inpumkhat leh, hnam khat, chhul khat chhuak kan nihnate a taka hmanga unau kan nihna vawng nung tlat turin theihtawpin hma a la thin a, chi peng nghenchhan zirlai pawl (Tribe based Students’ Organisation) chi hrang hrang pariat (8) heng — Hmar Students Association(HSA),Lai Students Association (LSA), Mizoram Bawm Students Association(MBSA),Ralte Students League (RSL), Mara Students Organisation (MSO), Ranglong Students Union (RSU), Thado Kuki Students Union (TKSU) leh Siamsin Pawlpi (SSPP) — te nen inzawmin, MZP ah an in-affiliate vek a, lungrual tlang taka thawkin mawhphurhna inhlan tawn thin a niin, harsatna tawhte insutkiansak tawn thin a ni bawk.

Tin, India hmarchhaka state hrang hrang zirlai pawlte inhlawmkhawmna North East Students’ Organisation (NESO) ah hian Constituent Unit niin, tunah hian he pawla Vice Chairman nihna a luah mek a ni.

Zirlai pawl a nih angin zirlaite hamthatna turin MZP hian theihtawpin hma a la thin a, a din champha 27th October chu Mizoram sorkar chuan MZP ngenna angin ‘Zirlaite Ni’ ah a puang a, he ni hi Mizoram pumah zirlaite tana tangkai thei ang ber leh chhinchhiahtlak taka hman thin a ni.
Chimralna laka Zofate himna tura a hmalakna kawng hrang hrangah thil dik lo titute huaisen taka doin, thil tha titute erawh a chawimawi thin a. Zofate dinchhuahna turah Mizoram mai ni lovin, Central sorkar thlengin a tul dan ang zelin hma a la thin a, enhran leh thlauhthlak bik nihna ata dinchhuahna tur leh, Mizote vohbik kan nihna leh hungbik kan nihnate chu a nghin lohna turin theihtawp a chhuah thin a ni.

Tin, mite tih theih ang hi Mizoten kan ti thei a ni tih a hriat angin a takin Mizoten kan nunpui nan theihtawpin hma a la thin bawk.
“Mizo zirlaite — kan ram leh hnam tan”


Contact :
MZP Pisapui
Near City Park, Opposite Raj Bhavan ‘S’ Gate
Upper Khatla, Aizawl - 796 001
P.O. Box - #91
Ph : 2328660 / 2316853 / 2301708
Visit Website : http.www.mzpmizoram.org
e-mail : mzpghq@yahoo.co.in



2009-2011
ELECTED OFFICE BEARERS

President
V.L.Krosshnehzova

Vice President
S.Lalrinawma

General Secretary
H.Lalremsiama

Asstistant General secretary
Lalsangzuala Ngente

Treasurer
Lalhmachhuana

Finance Secretary
Lalnunnema Ralte

‘I ram leh hnam a boral chuan nangpawh zuah i ni bik lovang’

Press Release 5th march 2010

PRESS RELEASE

Dt. 5th March 2010 dar 12:00(Noon) hian MZP huaihawtin CYMA Hall, Tuikhuahtlang-ah ‘Zoram Ni’ urhsun taka hman a ni. He hun hi Pu S.Lalrinawma, Vice President-in a kaihhruai a, Pastor Biakthansanga President, Mizo Conference Seventh Day Adventist-in hunserh a hmang a, Pu H.Lalremsiama General Secretary hnen atangin he ni hi hman a nih chhan leh lo hman a nih tawh dan report kimchang tak ngaihthlak a ni a, 5th March 1966-a nunna lo chante Sunna hun Pu C.Lalhmachhuana, Adviser kaihhruainain hman a ni. Pu Lalhmachhuana Tresurer in North East State hrang hranga zirlai pawla MZP in a thawhpui te Khasi Students’ Union (KSU) Tawipra Students’ Federation,(TSF), All Manipur Students’ Union (AMSU), All Tribal Students’ Union of Manipur (ATSUM), Garo Students’ Organisation (GSO), leh Boro Women’s Justice Forum te hnen atangin Zofate min tawrhpuina lehkha min rawn thawnte chu a chhiarchhuak a, hun kar lakah zai mawi ngaihthlak a ni bawk.

He hunah hian Pu VL Krosshnehzova President chuan thuchah sawiin, “ Tunlai hian Mizoram bomb a ni tih leh bomb a ni lo tih chungchangah inhnialna tam tak chhuak chu a awmna hmun atanga paihchhuah a, a thlenna tur hmuna puak dur kha Mizote sawi dan chuan bomb a ni.Mizote nuna thil thleng pawimawh tak sawi nep tumna a awm hi pawi ka titakzet a, Mizote hi innghirngho tham kan awm loh tehlul nen, hetianga kan inchirhtheh vak vak thin hi bansan tawh ila ka duh em em bawk a ni. Thil kan ngaihtuah chian tawk loh vangin he ni hi mi thenkhatin kan dodal niin a lang. Inpumkhatna leh inunauna, inremna atan he ni hi hmang ila ka duh hle a ni.

Mizo chungchang sawi zuiin, kei hi ka intih Mizo avanga Mizo ka ni lo a, ka nu leh pa, min hringtute kha Mizo an nih avangin Mizo ka ni a.Mizoin ka piang a, Mizo vekin ka thi dawn a ni.Kan hlauh zawng leh kan ngaihsan zawng te avangin kan Mizo-na hi dal mah se, kan pianpui hnam hi thlan khurah kan luhpui dawn tho tho a ni. Ram chu hnam tana buatsaih a nih avangin hnam chuan ram a vawnghim tur a ni. Ram leh hnam hi sawi hran theih a ni lo a, political party thenkhatin ram leh hnam hi a kal thiang rial rial a ni tih hre loin ram tel loin hnam kan inhmangaihsiak a, chuvangchuan kan ram zimte hi kan humhim zo lo thin a ni.

Rambuai laia kan tawrhnate kha mi thenkhatin sawinep tum mah se, sawinep theih a ni lo a, a nep thei chuang bawk lo a ni. India hian kan ram leh hnam nuna thil thleng rapthlaktak kha kan la theihnghilh lo a ni tih hria se kan duh a ni.Ram leh hnam tana nunna hlu tak hlantuten an nunna phal taka an hlanna te, silaimu kara mi tlawmngai tak takte thawhrimnate, kan nu leh pate’n Pathian an auhnate kha hrereng chungin vawiin hi inpumkhatna ni atan hmang ila ka duh takzet a ni,” tiin kal khawm te a chah a ni.

Tin, he hunah hian Dr. Samujal Battacharya NESO Chaiman Special Guest chuan thu sawiin, “Kan history hi kan theihnghilh tur a ni lova, MZP in Zoram Ni a buatsaih hi a tihtur dik tak a ti a ni. Engvanginnge kan hman loh ang, hmanni lawk pawn Punjab- ah Jallianwala Bagh Massacre avangin Punjab mipuite pawh an la thukhawm alawm. Hun kal tawh pawh nise hitory a ni a kan hrereng tur a ni a, mahse phuba lakna lam hawi zawngin kan in zirtir tur a ni lo a, inlungrualnan leh dinchhuah phah nan hmang ang u. He Zoram Ni hi North East a zirlai pawl hrang hrang ten kan thlawp tlata tha kan ti a, NESO pawhin kan thlawp tlat a ni. Engvangin nge kum 44 meuh a liam tawhhnu pawhin India hian Mizo mipuite hnenah ngaihdam a la dil loh, hei hi a chhan chu Mizo mipuite leh North East mipuite hi min ngaihthah vang a ni.North East atang ngei pawhin India Prime Minister kan nei a, 5th March 1966 a Mizo mipuite chunga thil thleng avang khan amah atang hian re-action a neih kan hre tur a ni.Tuna kan Prime Minister ni ta hian Rajya Sabha MP anih lai pawh a hnamdangte(Sikh) chunga ngaihdam dil thei hian Prime Minister anih hnu hian Mizote chungah pawh hian engvanginnge ngaihdam a dil theih loh ang. Chuvangchuan, Prime Minister hian Mizote chungah ngaihdam a dil tur a ni,” tiin kalkhawm te hmaah thuchah a sawi a ni.

Pu R.Zamawia paper ‘Ni 5th March 1966 hmalam chanchin’ leh Dr. JV Hluna paper ‘Ni 5th March 1966 hnu lam’ chanchinte ngaihthlak anih hnuin a duh apiang tan thusawina hun tawi hlimawm tak leh hlawhthlak tak neih a ni.




Sd/-
(LALSANGZUALA NGENTE)
Asst. General Secretary