MZP Press Statement 18th May, 2010

MZP Tlabung Sub-Headquarters in Ni 14th May 2010 a zirlai titha chawimawina an buatsaih hmang turin MZP General Headquarters President Pu VL Krosshnehzova leh MZP hruaitu dang te chu an kal a. He ta an kal tum hian donation khawn tura kal an no lova, zirlai titha te chawimawina hun a kal an ni a, sumdawng hnenah donation khawn pawh a awmlo. Amaherawhchu helai hmun a Vai Nepal Kanti Chaudury hian Tlabung ah hian MZP leh MSU te din a tullo a tih thu mi hrang hrang hnenah a sawi thin angin thu zawtfiah turin koh a ni a. Mizo Zirlai Pawl hi khawi hmunah pawh a ding thei a ni. Nepal Chaudury hian thu zawh fiahna hi a chhang duh lova, chhang ta che ti a an tih hnuin a Nihliap ken lai in MZP President hi a kawk a, nihl;iap hi an laksak hnu ah,a kut zungchalin a kawk leh a, chutianga MZP a thamloh zia a lantir takah chuan MZP hruaitute hian an khawih ta deuh a. Hei hi Unconcious ang hial a sawi phei chu a diklo hle a ni. Tlabungah hian boruak tha tak hnuaiah inkawm ho zui anih hnuah Nepal Kanti Chaudury hian Lunglei lamah leikuai tak leh diklo takin alo han zualkova. Thlamuang tak leh hlim taka Lunglei Headquarters MZP President Inah MZP General Headquarters hruaitute chu Aizawl lam pan tura an awm laiin LDYCC te chu an lokal in MZP chuan tha tak a sawiho pui an duh a. Amaherawhchu an ruih deuh avangin sawihona tha an duh lova MZP General Headquarters President phei chu kut an thlak hial a ni. He thilah hian MZP te chu lungawi lovin FIR an thehlut ta a. Amaherawhchu LDCC hruaitute nen tha taka inrem siamna neih a ni a. MZP hruaitute Aizawl lama an haw hnuah thu belhchian dawllo hmanga Press Release siam ani ta mai hi MZP chuan mak a ti hle a, thu dik tarlan ve a tulin a hre ta a ni.


MZP General Headquarters hian Tlabung-a awm hnamdang sumdawngte hnenah Donation a khawn ngai lova. Dt.15.5.2010 zing pawh hian chengkhat pawh an lak sak bawk hek lo. Heng hnamdangte leh MZP Sub- Headquarters Tlabungte in tanpui tawh dan te an thlir pui mai a ni. Tin, LDYCC te hian hemi chungchangah hian inrawlh na tur an neih MZP Gen Headquarters chuan a hre lova, tanpuina chu a petu leh a pek a te inkar thu-ah angai a ni. Thuneitu anga inngaia lo sawi ve tur an neih a hre lo a. Tin, heng ho zinga Nepal Kanti Choudury sawi tel a, Sum dil anga tarlan a ni hi thudiklo niin, a ni hi MZP leh MSU chungchanga mawi lo taka thusawi thin ni a hriat anih avang leh, Mizo leh Chakma inkara thu veivir thin nia hriat chungchang sawipuia thu zawhfiah mai a niin, MZP Pisa chhungah ngei MZP President zah lo tak leh mawilo taka a khawsa a, a tawngkhum avanga zilh hau hi tawk a ni. Nikhaw hre lovin a awm lova, sum engzatmah dil a ni hek lo. A taksa tana na khawpa kutthlak a ni lova, tha taka ti ti ho na neih a nih hnuah lungawi taka inthlah fel a ni. Hemi chungchanga Nepal-a, kutthlakna avanga damdawiin luhphah anga sawi leh unconcius phah ang hiala sawi a ni hi MZP chuan mak a ti takzet a, inremna siam anih hnu a damdawiin atanga achhuak zui nghal ta mai hi mak a ti lehzual a ni.


Hemi denchhena MZP General Headquarters hruaitute hawlam lo dang bet a thuneihna inpe chawp a, MZP Headquarters Lunglei President chenna inchhung pawh zah zo lova, zu rui chunga an khawsak dante, Dan leh Thupek keng kawhtute zawk pawh mawi lo taka an ankhum dante kha MZP chuan a dem takzet a, an party sawrkarna chelh mek chu an timualpho takzetah a ngai a ni. MZP Gen Hqrs President leh Nepal-a inkawm dan chungchang MZP President-in SP Office-a a sawi dan “MZP sawiselna leh elhsen taka Nepal-a a tawng chu Party-a nihna sang tak a vawn vang anih theih thute, Party a tui tak tak anih chuan itsiktu a neih avanga a tana tha tur zawk nia ngaiin hruaitu nihna hi chelh loh ngam a tha lo maw? tiin thurawn a pe a ni. Amaherawhchu, hei hi chu Party thu a ni a, MZP lo sawi ve tur a awm lo” tia a sawi chu kaihleka LDYCC-in “Nepal-a Party atanga bang turin a nawr” tia thu an rawn chhuah ta mai hi MZP Gen Hqrs chuan ngaihthiam har a tiin thu belhchian dawllo leh mi thusawi kaihlekna a ni tih MZP chuan tarlan ve atul a ti takzet a ni.


LDYCC hruaitute hian thuneitute hnena thu thlen chauh hi an hmalakna nise, kan President hian an kut hi a tawrh a rinawm lova, ruilo hai lova khawsa phei chu nise an tih tur diktak pawh an hriat ngei MZP chuan a ring tlat a ni. Rui chungin MZP Headquarters Lunglei President In an luh chilh a, a thawhpuite na tak takin an vau a, thuneitute (ADC, SDPO etc) te lo thlen tawh hnu ah pawh a zahawmna hre pha hauh lovin khawlaiah MZP General Headquarters President kut an thlak duh a, buaina chhuak zel tur vengtu Police pawh a Name plate pawhthlak sakin na takin an vau zui a ni. MZP Headquarters Lunglei President chenna hi Lungin an tawng zuia, inchhunga la awm te pawh luhchilh tumin kawngkhar an sawi chhe bawk. Tin, MZP Headquarters Lunglei Executive Committee Member pakhat pawh a hrawkah rek betin, a bike khalh chabi laksakin he bike, Lunglei President ta chu tun thlengin chin hriat lohin an la awm ta nghe nghe a ni.


Hemi piah lamah MZP Sub Headquarters Tlabung sawmna a kalve Zaithiam Mimi-i te nufa leh MS Khiangte te chu Lunglei chhuahsan lo turin an dangbet a, MZP General Headquarters hruaitute nena an chuanna motor pawh misualrual thil tih ang maiin a hma darthlalang an vawm keh a, a side glass dinglam an tihchhiat vek bakah, a bumper an chhu sawi nual bawk. Tin, motor chhung a zaithiam te thuamhnaw pawh hun rei tak chhung lakchhuah an phallo a. He motor hi mimal ta hire a nih avangin a him zawk nan Police venhimna hnuaiah Lunglei P.S. kawtah dah a ni phawt a, a chhunga MZP hruaitute bungrua pawh sawisak an tum avangin Police Station Building chhungah lak luh a ni hial a ni.


He buaina chuchangah hian harhfim zawk a lokal LDCC hruaitute leh MZP hruiatute chu dt.16.5.2010 zingah Lunglei S.P. kaihhruaina hnuaiah thu tha sawiin, LDCC President in an naute khawsak dan chungchanga ngaihdam a dilna chu MZP General Headquarters hruaitute chuan puitling takin an pawm a. Tlabung a Nepal’an a chochhuah avanga an khawsak danah Dan pel thil a lo awm palh a nih chuan LDCC hruaitute chungah hriatthiamna ngenin, party anga kalpui anihloh zia te chiang taka a hrilhfiah hnuin boruak tha tak karah inremna siam a ni zawk a ni.


He thil thlenga LDYCC hruaitute chet dan zawng zawng hi harh fim thil tih a nih loh avangin MZP chuan a dem tak zet a, MZP General Headquarters President zahawm tak kut hial an thlak duh phei hi chu Ram leh hnam tana MZP pawimawhna an hre phak lo hle ah a ngai a, Vawikhatmah thleng nawn tawh lo se a duh tak zet a ni. Hemi denchhena MZP Headquarters Lunglei President Bike bo chhuichhuah loh a a la awm pawh hi a rang thei ang bera hmuhchhuah anih theih nan MZP chuan bike chabi laksaktute hi a phut tlat a ni.

1) LDYCC leh MZP te hian inremna siamin Media ah pawh tlangzarh loh nise tiin lungawi taka inthlah liam a ni a. Nimahse nimin lamah uchuak takin thuchhuah an siam a, hei hi an puitlinloh zia pholang tu a ni a. MZP General Headquarters chuan LDYCC hi a dem tak zet zet a ni. An thuchhuah siamtu pawh hi MZP President khawihtute ngei kha a ni.

2) Mizo Zirlai zawng zawng Mizoram leh ram pawn, foreign thlenga Mizo Zirlaite puipa ber kan President in hetianga party pakhat thalai pawlin a zahawmna pawh zah zo lova kut hial thlak duh a, Police te phei chu awmlo se a nunna atan hial pawh pawi thei tura ram leh hnam aia an party an dah lian zawk a thil anti hi pawi kan ti a, Ram leh Hnam chungchanga inpe, humhalh tlat duhtu, mahni aia Ram leh Hnam dah pawimawh zawktu Pu VL Krosshnehzova kan President tawrhna hi kan tawrhpui tak zet a. A tawngkam chhuakah pawh a ma taksa na aia “Mizo fa in Mizo vek Vai chhana kut a thlak duh hi na ka ti” a ti thei hi kan chhuangin kan ngaisang tak zet a ni. A thlavang hi kan hauh takzet a, engpawh achungah lo thleng se a thawhpui leh zirlai zawng zawngte hian hma kan hruai ngam a ni.

3. Hetianga Ram leh hnam pawha chhum hminloh mahni pumpuar nana party a awmte hi Ram leh hnam hmelma lian tak an ni a. An hotute hian Mizo Nationalism hi tuh hmasa tawh se. Vawikhatmah hetiangin Vai thlavang hauh avang hian Mizote chungah engmah thleng tawh lo se kan duh tak zet a. Tlabung khua, Mizo fate chenna, ramri bul chu Party hmangaih zawk avanga vote duh avangin kan pi leh pu te’n ram anlo vah zau chu Tlabung khaw mipuite hnamdang lakah an him tawhloh avangin MZP an pun a, thu zawh fiah pawha MZP President Mizopa ngei zah zo lo tu avanga hetianga thil a thleng hi a na kan ti a, tun chinah Vote duh avang leh Sorkar hotute inthlahdah thin avanga kan ram a lo pem te hi intlawnsiak tawhlo ila, a kawm dan tawk thiam ila, chu chuan inchimralna thilah pawh min venghim ngeiin a beiseiawm.

4) Kan hruaitute chuanna dim dawilo taka an khawih chhiat tawh hnu pawh a, Lunglei a kan President bike hial tun thlenga an la ru bo duh hi an nunrawng kan tiin an mawlzia pholangtu ah kan ngai a. Hetianga Vai thlavang hauh a nunrawng tak a che a, Motor hial tihchhiat anih tawh hnu pawh a, a na thei angbera hruaitute kutthlak duh a thi mahse pawi tihna an neilo kha Zofate chimrala kan awmloh nan leh inpumkhatna duhtu kan hruaitute thlavang hauh nan hian member te hian thih pawh kan ngam ve a. Bike hi him dam taka hmuh anih loh chuan a na thei ang berin engpawh huamin hnam tan hma kan la ve ngam.



LDYCC thil tih dan bawrh bawrh hi an hotute Aizawl lama mite hriatpuina a ti an nih MZP chuan a ring phal lova, anni party hi remna leh muanna tlangau pui a Zoram dung leh vang fang thin an ni a. An thu hmu a hetiang thil hi ti an nih erawh chuan an thu kenah an chiang tawk loah MZP chuan a ngai ang. Amaherawhchu an thu hmu lova thil ti annih chuan hetianga rawva taka mimal dikna chanvo pawh zah lova che te hi an phu tawk anga hrem ngei MZP chuan a phut tak zet zet a ni. Mizo thlavang a hauhna ah dan pela chet neih changte pawh a lo awm a ni mai thei a, chutiang a awm a nih chuan MZP chu hnam tan tawrh a inpeih reng a ni.

Issued by Mizo Zirlai Pawl General Headquarters, Aizawl

MZP Press Releasee 17th May, 2010

Technical Entrance Exam 2010 result-a thil fel lo awm chungchangah MZP chuan zirlaite’n an chanvo dik tak an chan theih nan theih tawp achhuah a, chutih mek laiin tu te’n emaw MZP te duh duh tih tir theih awm anga ngaih theih tur thil chanchinbu-ah te a rawn lang ta chiam mai hi, MZP chuan hriatthiam har a tiin, thudik tarlan ve hi a tih turah MZP chuan a ngai a ni.

Technical Entrance Exam 2010 hi a tir atangin MZP chuan a thlir reng a, Higher Education Minister hnenah ngei pawh exam dik leh felfai kan duh thu hi kan thlen a ni. Chutih mek laiin Result lo chhuak chu thil dik lo leh fel hlel a awm avangin ennawn leh angai nghal pang mai kha MZP rilru a na em em a, he thilah hian a mawh phurtu hai chhuak a hrem ngei turin Mizoram sorkar chu MZP chuan a ngen nghe nghe a. Tin, dt. 26/4/2010 a Press Statement ’ a siam ah ‘MZP chuan Director H&TE leh Technical Wing enkawltute hi senghawi ngei nise’ tha a tih thu a chhuah a, MZP thu leh hla chu ngai pawimawhin Chief Minister zahawm takin ‘dik chu dik, dik lo chu dik lo’ ti a, zirlaite chanvo dik tak haichhuah a nih theih nan leh mawh phurtute haichhuah a nih theihnana hma chak tak a ala hi MZP chuan lawmawm a ti a, thil ti dik lo tu te pawh chhui chhuah a la nih ngei a beisei.

He Entrance exam-a thil dik lo kan hai chhuah nan hian zirlai mangang MZP-a rawn zualkote lehkha atangin document hmuh a ni a, result chhuah hnu lawk ah khan SPIO, H&TE hnenah RTI hmangin Document kimchang dil a ni a, tun thleng hian chhan a la ni lo a ni. Tin, H&TE Minister leh Secretary te’n RTI kher ngai lova Document lak theih a nih thu an sawi hnuin MZP chuan H&TE (Technical wing) hotute hnenah Document hi dil a ni a, mahse hemi tum pawh hian min la pe thei chuang lo a ni. Chanchinbu leh ti ti leng vel atanga lo lang ang hian Technical wing a mite hian MZP hi lo thawhpui tha (Co-operate) chu nise buaina tam tak kha MZP chuan pumpelh theih a nih a la ring fan a ni.

Hetiang hi thil awm dan a nih avangin, MZP chuan he Entrance exam-a thil dik lo chungchang a man chhuah an awm a nih chuan ‘hremna, na thei ang ber’ an chungah sorkar hian lek ngei se a la ti reng a, engtiklai mahin a thuchhuah tawh hi a la zuk lo a ni.






(LALSANGZUALA NGENTE)
Asst. General Secretary

MZP Press Release 10th May, 2010

Vawiin Dt 10th May 2010 Dar 2:45 PM khan MZP OB te chuan Chief Minister Pu Lal Thanhawla chu Technical Entrance Exam Answer key diklo chungchangah Press Conference neih zawh hnuah hmuh a ni a. Hemi chungchang hi Chief Minister hnenah thlen niin result dik leh fel fai neih a nih nan mi thar hlakin ‘answer key’ diktak hmangin ennawn leh vek se ti a an ngenna chu, “Ennawn a ni anga, mithar hlir rin ngam deuh deuh ten an ennawn anga, naupang exam nawntir an ni lovang”, tiin MZP hruaitute hnenah hian a lo sawi a ni.

MZP chuan Chief Minister-in chawp leh chilh taka hun remchang a lo siam hi a chungah lawmthu an sawi tak meuh a, hetianga zirlaite harsatna hria a answer key diktak hmanga ennwn tura MZP hruaitute hnena a lo hrilh hi MZP chuan lawmawm a ti tak meuh meuh a, result dik leh felfai ngei zirlaite’n an neih ngei an beisei a ni.





(LALSANGZUALA NGENTE)
Asst General Secretary

MZP Press Release 6th May, 2010

MZP General Headquarters Executive Meeting chu Vawiin Dated 6th May 2010 dar 11:00 khan MZP Pisapui-ah neih a ni a. Meeting hi Pu VL. Krosshnehzova President in kaihruaiin Pu C.Lalhmunmawia Secy. i/c Sports & Youth Affairs in tawngtai na hun a hmang a, he mi hnu hian MZP hmalakna hrang hrang reports ngaihthlak a ni.

Meeting-ah hian dt. 23/4/2010 a Separate Time Zone for North East Seminar a hman zawh tak thlir letna hun leh Pawngsual chungchang Talk Show MZP in a buatsaih thlirletna hun te hman a ni bawk.

MZP chuan kum 2010 Technical Entrance Exam Result chhuak a dik lo awm avanga en nawn leh na result dt.5/5/2010-a chhuak ta chu ngun takin a thlir a, he result hi ngunthluk taka ennawn a nih angin a dik ngei MZP chuan a ring a, result dik leh felfai a nih leh nih loh ngun takin a chhuizui mek a ni.

Result ennawn a nih chungchanga hun rei tak chhung zirlaite rilru pangkhing tak leh khaihlak taka an awm kha thinlung takin MZP chuan a tawrhpuiin, khatianga zirlai ngaihthahna kha thleng tawh lo se a duh tak zet a ni.

Result diklo zirlaite hlui an nih avanga ennawn ngaia a awm leh hemi vanga rim taka mi tamtak te’n ngaihtuahna senga hna thawh a ngai chu MZP chuan pawi a tiin, hetiang thil hi tunhnuah thleng nawn tawh lose a duh tak zet bawk. Tuna result chhuak hi a dik a nih chuan allotment pek chungchangah langtlang taka zirlai te’n an hriat theih nan ruahmanna siam turin a ngen bawk a ni.

Result chhuah nawn leh hi a dik a nih chuan hmun hrang hranga zir turte harsatna a theih ang anga pui turin MZP chu a in hawng reng a, thil hriatfiah loh zawh fiah duh emaw rawn duh neite chuan MZP Pisapui Upper Khatla, Oppsite Raj Bhavan, Aizawl pan theih reng a ni. Tin, Technical Entrance exam chungchanga MZP hmalak thinnate, a hnu thleng pawha zirlaite a lo puih tawh dante leh tuna zirturte tan a hriattur pawimawh tak tak in hrilhhriatna hun MZP chuan remchang hmasaah buatsaih a tum bawk a ni.
Meeting hian MZP Secretary thar atan heng mite hi a ruat a ni.
1) Joseph K. Zohmingliana Secy. i/c. Students’ Welfare
2) Malsawmring Ranglong Secy. i/c. External Affairs

He meeting-ah hian Excecutive Committe Member “L.Z. Tochhawng leh Joseph Zorammuana” an pa te’n an boralsan avanga ralna hun hman a ni bawk.





(H.Lalremsiama)
General Secretary

MZP Press Release 1st May, 2010

H&TE Deptt. in Technical Entrance Exam 2010-a result dik lo ennawn leh tura MZP ngenna, kan hun tiam chhung ni 30.4.2010 ral hmaa phochhuah a nih hman tak loh chungchangah a ngaihdan MZP chuan puan chhuah tulin a hria a. Hun tiam chhunga peih hman loh a nih chhan hi dik tak leh felfai taka tih tum vang a nih chuan MZP chuan hriatthiamna thui tak a nei a, chutih rualin MZP ngenna tihhlawhtlin duh loh hrim hrim vang emaw thil sual tih duhna thinlung vang emawa titlai lui an nih erawh chuan zirlaite zah lohna leh hmusitna lian takah a ngai a, result hmasa an buatsaihna kawnga an hmanhmawhzia minister-in a puanzar dan leh tuna an hmanhmawh tak loh dan hi thil inpersan takah MZP chuan a ngai a ni.
Exam buatsaihtute hian ni khat thil thuah result an peih theih laiin tihsual palh endikna atan ni 4/5 lai hun an hmang leh si hi a mak hle a, a changtu minister-in “Mark mal te te ennawn (re-evaluate) tur ni loin, mark belhkhawm (total mark) zel ennawn (re-tabulate) a nih tur thu” a lo sawi tawh a. Chutiang rigawt atana hun an hmang rei lutuk hi zirlaite ngaih pawimawh lohna lian takah MZP chuan a ngai a, insawifiah ngai a awm a nih chuan a rang thei ang bera insawifiah turin ennawn leh tute a phut a. Ennawn leh dan tura Minister sawi dan leh Secretary-in complain an dawn 59-te an ennawn dan a sawichhuah pawh hi a inkalh a, secretary sawi danah chuan result hi re-tabulate lovin re-evaluate a ni tihna a ni a, hetia thu a inkalh nuk mai hi thil nihphung turah MZP chuan a ngai lo.
Result siamthat mek nghakhlel taka lo thlirtu zirlaite dinhmun hahthlakzia, inpuahchahna nasa tak leh sum tam tak an sen dan te, result felfai lo a awm avanga an tawrhna te hi minister leh director-te hian an hriathiampui tawk lo niin a lang a, MZP chuan pawi a ti tak zet a ni. Thil dik lo-ah hian chhuanlam dapkual loin anmahni mawhphurhnaah inbel ngam se, Exam beitute leh mipui lungdamna tur zawnga chak taka hma la turin MZP chuan a phut tlat a, hun tiam chhunga an peih theih loh chhan pawh tarlang lova, zirlaite chi-ai taka an awm tir reng hi MZP chuan a dem tak zet a ni.
Minister-in, thuthar lakhawmtute hmaa Technical entrance result buai thin chhan, tlin loh vanga lungawi lote’n thurualpui an neih zel thin vang ni awma a sawi hi MZP chuan mak a ti a, hemi chungchang sawifiah turin minister hi a phut a ni. A tling lote tihbuai ni loin exam buatsaih danah leh result siam danah thil fel lo a awm vanga hetiang hi thleng thin a nih laia, zirlai pawisawi lote mawhpuh an ni hi MZP chuan hriatthiam har a ti hle a ni
Kum tin deuh thaw he exam buai ziah vanga a mawhphurtu Director leh Technical Wing enkawltu senghawi tura MZP-in sorkar a ngenna tihhlawhtlin a nih loh chuan MPSC kuta he Exam dah mai hi MZP chuan tha zawkin a ring a ni. Tin, MZP te a tiam anga result felfai zirlaite min hlui thei lotu minister hna chanvo tlansan ngam tura ngen chungchangah, inthiam lohna nei lova a chanvo a tlansan lo a nih pawhin, a chanpual chhawk zangkhai a ni ta tho a, education leh higher & technical education lamah a insawrbing lehzual thei ang tih beisei avangin, hetia a chanpual chhawk zangkhai a ni hi, duhthusam chu ni lo mah se MZP lawm khat chu a tling. Hei hi Pu Lalsawta chanpual lak then a nih avangin ‘kan lawm e’ tihna a ni lo a, education leh higher & technical education lamah a insawrbing thei ang tih beisei vang zawk a ni.
Public exam/test-ah reng reng result buatsaih hi a ruk thei ang ber leh felfai thei ang bera tih tur a ni a, naupangin a paper endiktu leh a result siamtu a hre tur a ni lo. Chutiang a nih laia ualau taka result an ennawn hi MZP chuan tha a ti lo hle. Result buatsaih lai heti taka pawnlam mite chimbuai an remti leh media lamah a lem nen lam tihlan an remti hi thil nihphung a ni lo a, thil inhmeh lo leh dik lo takah MZP chuan a ngai a ni. State ralmuang lo phei chu ni ila a endiktute tan hian a thlamuanawm loh thei viau ang. ‘Hei hian a changtu minister leh department hotute hi ‘academician’ an nih lohzia a tilang em?’ tih hi Mizoram sorkar leh mipuite hnena MZP zawhna a ni. Result ennawnnaa NGO te tel ve hi thil nihphung lohva ngaih a nih vangin hemi atana sawmna chu MZP chuan a hnawl a, Political Party pakhat Frontal Organisation telna turah phei chuan MZP chuan a ngai lo hulhual a ni.
He Exam buatsaih a nih laia a Deptt. hotu ber Director awm loh chungchangah, a zin thu emaw leave a lak thu emaw lam tarlan hi MZP tum ber a ni lo a, hetiang hun pawimawh lai taka a thut hmun a chhuahsan leh, leave la lo Joint Director 2 awm reng laia leave la lai ber kher hnena charge a hlan kha MZP-in kawnghmang lo a tih thu sawichhuah a ni mai chauh a ni.
Technical Entrance Exam hi hnam hnuk khawih phak thil pawimawh leh zirlaite chanvo rahbeh theihna a ni tih hriain tun hma atangin MZP chuan kum tin a lo ngaihven tawh thin a. Thil dik lo leh felfai lo a awm changin theihtawp chhuahin a lo bei tawh thin a, tunah leh hun lokal zel turah pawh a enzui zel dawn a ni.

MZP General Headquarters Mizoram Aizawl

MZP Press Release 26thApril, 2010

Dt.26.4.2010 dar 1:00 khan MZP General Headquarters Executive Emergency Meeting chu MZP Pisapui-ah neih a ni a. Emergency meeting hi Pu VL Krosshnehzova President in a kaihruai a, Pu H.Lalremsiama General Secretary chuan Dt.22/4/2010 Technical Zirtur thlanna (Exam) Higher & Technical Department buaisaih a result felfai lo chungchang leh MZP hmalakna hrang hrang report kimchang tak a pe a ni.

Technical zirtur thlanna exam result hi dt.23/4/2010 zanlai dar 12:00 khan tih chhuah a ni a. Result-ah hian zirlai an exam lohna Group a tling an lang nual a, eg: MBBS zirtum (Biology Group) tan Mathematics Paper exam a ngai lova, Engineer zir tum (Engineer Group) tan Biology paper exam a ngai lo thung. Hetiang a ni chung hian MBBS zir tura exam kha Engineer zirtur list ah khan a awm tho a, chutiang bawkin Engineer zirtur exam kha MBBS zirtur list ah an lang a ni. MZP chuan kumtina Technical zirtur thlan chung chang a thil felhlel awm ziah thin hi pawi a tiin kumin ah chuan result felfai tak kan neih theihnana hma la turin Dt.14/4/2010 khan Minister Higher & Technical hnenah ngenna hi thlen leh a ni bawk, Minister lehkha copy hi Director hnenah pek a ni bawk a ni.

Hetiang a ngenna MZP in thlen a ni chung hian kumin ah pawh result felfeilo tam tak a awm leh cheu hi MZP chuan pawi a ti tak zet a, hei hi zirlaite Career ngaihthahna leh zirlaite rilru tih chi ai pawi tih loh na ah MZP chuan a ngai a, thil tidiklotu hi a dem tak zet a ni.

MZP chuan Technical Entrance Exam result dt.23/4/2010 a chhuak a diklo awm zawng zawng hi dt.30/4/2010 ral hma ngeiin dik leh felfei taka siam tha turin thuneitute a ngen a , hemi chhunga an tifel theilo anih chuan a tul angin MZP chuan hma a la chhunzawm dawn a ni.

Hun engemaw ti atanga kumtin deuh thaw a kaihhruaina hnuaia exam chungchang buaina awm ziah hi chinfel anih theih nan MZP chuan Director H&TE leh Technical wing enkawltute hi senghawi ngei nise tha a ti a. Tin, nikum lamah pawh felfei taka result siam a nih theihna tura MZP a lo tiam tawh tu leh he buaina bulthum ching fel theilo Minister kan nei hi vanduaithlak MZP chuan a tiin a chanvo tlansan ngam turin a ngen a ni

MZP General Headquarters Mizoram Aizawl

MZP Press Release 24thApril, 2010

Dt.23/4/2010 a Mizoram Board of School Education (MBSE)-in Higher Secondary Leaving Certificate (HSSLC) 2010 result felfai leh changtlung tak a ti chhuak thei chu MZP chuan lawmawm a ti hle a. Result Bu atang mai nilo internet kal tlanga en theih a ni chu zirlai hmun hrang hrang a awmte tan a awlsam phahin thil zawng chhang thlak tak a ni a. MBSE thawktute thawhrimna hi fakawm a tiin thawktute chungah MZP chuan thinlung takin lawmthu a sawi a ni.

Kumin ah hian Zirlai Exam zawng zawng mi 7362 zingah zirlai 4489 (60.98%) in hlawhtlinna changin an passed a, heng zirlai hlawhtlingte hi MZP chuan a chhuangin an hlawhtlinnaah thinlung takin a lawmpui a, an kal lehzelna turah duhsakna sang ber a hlan bawk a ni. Chutih rualin zirlai la hlawhtling ve rihlote pawh beidawng mai lova rilru thar pua a lehpekah chuan hlawhtlinna chang ngei tura bei turin MZP chuan a ngen a ni.

Kumin result hi nikum lam aiin 0.60% in a sanga, a lawmawm em em rualin zirlaite chu hmalam pan zel tur kan nih angin tun aia tan la leh zual turin MZP chuan tuna zirlai ni mekte a sawm a ni.





(Lalsangzuala ngente)
Asst. General Secretary

MZP Press Releasee 23rdApril, 2010

Vawiin ni 23 April 2010 chawhma dar 11:00 khan MZP General Headquarters chuan, “Seminar on Separate Time Zone,” Vanapa Hall Aizawl-ah a buatsaih a. He hun hi Pu S.Lalrinawma Vice President in a kaihruai a, hunserh Rev.Lengluta’n a hmang a, Pu H.Lalremsiama General Secretary hnen atangin Seminar hman chungchanga report kimchang tak ngaihthlak a ni bawk. He hunah hian Pu Lal Thanhawla, Chief Minister chu Khuallian niin, Pu Benjamin IDAS, Registrar, Mizoram University chu Khualzahawm a ni. Tin, Pu Jahnu Barua, Padma Shree Awardee, Guwahati chu Resource Person a ni. North East- State hrang hranga MZP in a thawhpui Zirlai Pawl hrang hrang ten he Seminar- hi hlutin MZP an rawn hmanpui a. Tin, North East zirlaite thlungkhawmtu North East Student Organisation(NESO) hruaitute pawh he hunah hian kim takin an tel bawk.

Khuallian Pu Lal Thanhawla CM chuan thusawiin, “Ram changkang tak takah chuan Time Zone 2,3 te an nei a, a thenah phei chuan 5 te pawh an nei a ni. India ramah hian Time Zone hran nei ve ta ila kawng tam takin hmasawnna tur Economic ah leh thildangah pawh a neih theih a rinawm a ni. Ni chhuah hun leh tlak hun inanglo hi hunbi khatah kan in rintawm a, a bik takin hmarchhak a cheng te hian kan tuar zawk em tih a hriattheih. Assam ah chuan thingpui huan neitute chuan darkar khat in sana hi an herh hma hial a, Bangladesh ah chuanan ni hman a rei zawk nan sana an herh hma hial bawk. North East sana kan herh hma ve a tul a, kan awmna a khawchhak avangin Power enrgy tamtak kan save phah thei a ni. Time Zone thendarh chungchangah hian rawtna hrang hrang a awm tawh thin a, mahse pawm a ni ngai lo a ni. India ram hmundangah pawh Time Zone hran neih hi a tul ti tam tak an awm a, a then te phei chuan a mamawhin kan mamawh a ni an ti hial. AICC Sub-Committee a ka kal pawn ka sawi tawh a, Eastern Time ti ila tiin rawt na te pawh ka lo siam tawh a ni. North East hi in lak hran in hlau anih pawhin West Bengal leh Bihar te pawh a tel theih a tiin ka lo sawi fo tawh a ni. India hian Indian taka awm a min duh chuan Indian takin min thlir ve a ngai a ni. North East ah hian Mongolian thlah kan tam ber a, India ram hmun thenkhatah Hotel- a kan thlenin Passport min phut kher thin a, nangnin min enkawl tha duhlo anihchuan khawchhakah kan unauten min enkawl thei reng a ni tiin, National Leader inti National Outlook nei miahlo te hnenah ka sawi thin. Eastern Time Zone hi nei thei ila tiin ngaihtuahna ka lo sen reng laiin MZP ten hetianga Seminar changtlungtak in buatsaih hi ka lawm hle a, mithiam pawh hei aia tha hi an awm chuanglo a ni,” tiin kalkhawm te hma ah thu a sawi.

Khualzahawm Pu Benjamin-a IDAS, Registrar Mizoram University pawhin thusawiin, “Kan thupui hian ka rilru a lak em avangin MZU bak hmundangah Programme nei ngai manglo ni mah ila he Seminar atana Khualzahawm nihna hi lawm takin ka pawm a ni. State naupangte kan nih avangin hnathawh tur kan ngah bik a, ni khatah darkar 8 chauh hna kan thawk thei a, Time Zone hran hi nei ila hei aia rim zawk leh rei zawk hna kan thawh theih kan ring tlat a ni. North East State- a cheng kan ni a, India hi ram zau tak anih avangin kan inpumkhat a tul em em a, chuvangin he Seminar hian kan Sate theuh tana kan mawhphurhna kanin hriatthar lehna anih ka beisei. He Seminar hi hlawk taka kan hman ka ring a, a buatsaihtu MZP ten hetiang programme buatsaihna chang an hria hi an fakawm ka ti a an chungah ka lawm hle a ni,” tiin kal khawm te hma ah a sawi.
Pu VL Krosshnehzova, President MZP pawhin thusawiin, “Central Sorkar atanga hmasawnna tamtak kan hmuh te hi alo dawngsawngtute kan dikloh chuan hmasawnna dik leh inkhairual a thleng thei ngailo ang, hmasawn turin inpumkhat a pawimawh a, hmasawnnain a thlenna hmun te chimraltu nilovin min tihlawhtu a ni zawk tur a ni. Zofate hmasawnna tura inpumkhatna atan kan Chief Minister hian ke a pen ngam niin kan hria. North East mipuite inpumkhatna tur pawhin NESO hmangin hma kan la thin a, chumi atana hmala tur chuan ke pawh lo pen hmasa tawhtu kan CM zahawm takah hian rinna lian tak kan nei a ni. Zonuzemawi chhawm nung turin beiseina nung kan neih a tul a, Zofaten hmasawnna kan neih theihna tura ke kan penna kawnga hmanraw tangkai tak anih theihnan he Seminar hmangtu zawng zawng te dusakna ka hlan vek a che u,” tiin kalkhawm te a chah a ni.

Resource Person Pu Jahnu Barua chuan, “He thil hi kum 25 kal ta atanga ka rilru a lo awm tawh a ni a, kum 2 kal ta khan he representstion hi ka siam ta a ni. Time Zone hran kan neih theihlohna chhan chu thuneitute hi a tuartu an nih lovang a ni. MZP in Resource Person tura min sawm hi ka lawm hle a, a hlawhtlin ngei pawh ka beisei a ni,” a ti.

Gumjum Haider, Secretary General NESO chuan, “ NESO-ah hian MZP hi a pawimawh hle a. MZP tello hian a kal thei lo Central India te aia kan hmasawn lohna chungchang hi N.E. mite hian kan ngaihven tawk lo, NE mite hi State hrang leh hming hrang ni mah ila, kan inpumkhat a tul a ni. Separate Time Zone kan mamawh na hi theihtawp chhuahin i auchhuahpui ang u. Sparate Time Zone kan neih loh avanga sum, hun leh tha kan hloh zozai te hi a uiawm lutuk” a ti.

Seminar hi hun hnih ah then a ni a, chawhnu lamah Prof. Lianzela, Department of Economics leh Prof. P.Rinawma, Department of Geography te paper zir ho a ni a. Hemi hnu hian sawihona hlawhtling tak leh hlawkthlak tak neih a ni.

He hunhi Pu Lalmuanpuia Punte, Vice Chairman NESO in vote of thanks neiin hun hi khar a ni.



(Lalsangzuala ngente)
Asst. General Secretary

MZP Press Release 22ndApril, 2010

Naktuk ni 23rd April 2010 chawhma Dar 11:00 hian MZP chuan North East mipui te tana Time Zone hran neih chungchangah Seminar ropui tak a huaihawt dawn a ni. He hun hi Pu Lal Thanhawla, Chief Minister hova hman tur niin khuallian a ni ang a, Pu Benjamina IDAS, Registrar MZU chu khualzahawm a ni thung ang.

Mr. Jahnu Barua, Padma Shree Awardee, Guwahati chu Resource Person a ni ang a, ani hian hun rei tak chhung hemi chungchangah hian Research a lo bei tawh a ni. Thlirna chi hnih MZU atangin ngaihthlak a ni dawn a, Prof. Lianzela’n Economic thlirna atangin thu a sawi ang a, Geography thlirna atangin Pu P.Rinawma, Associate Professor MZU in thu a sawi bawk ang.

He hun hi MZP Vice President S.Lalrinawma’n a kaihruai ang a, General Secretary Report leh MZP President Pu V.L.Krosshnehzova thusawi ngaihthlak a ni ang a, Rev. Lengluta’n hunserh a hmang bawk ang.

He hun hmang tur hian North East India-a Zirlai Pawl MZP thawhpui; All Assam Students’ Union (AASU), All Arunachal Pradesh Students’ Union (AAPSU), Twipra Students’ Federation (TSF), Naga Students’ Federation (NSF), All Manipur Students’ Union (AMSU), Khasi Students’ Union (KSU), Garo Students’ Union (GSU) te bakah North East Students’ Organisation (NESO) hruaitu hrang hrangte an rawn tel dawn bawk a ni. Tin, NESO Vice-Chairman Pu Lalmuanpuia Punte in lawmthu sawiin hun a khar ang.

He Seminar hi thil pawimawh tak kan hmalam hun kal zel tura hma min sawn tir thei tur leh, hriatna zau zawk hmanga North East mipuite tanrual theihna tur kawng lian tak sial theitu tur a ni dawn a, he huna tel tur hian mi zawng zawng MZP chuan thinlung takin a sawm a ni.

Issued by MZP General Headquarters Aizawl Mizoram.

MZP Press Release 21st April, 2010

Dt. 21.4.2010 zana Laxmona’n Mizo hmeichhe naupang pawisawilo Khatla veng a mi kum 13 mi vel a pawngsual hi MZP chuan a dem takzet a ni. Kan tual zawlah ngei naupang kumtlinglo hnamdangin rawng taka a chunga thil a tihdan hi pawi a tiin, hetiang thil a thlen theihna tura hnamdang Mizoram chhunga zalen taka khawi thintute pawh MZP chuan fimkhur turin a chah nghal bawk.

Thuneitute’n rang taka Mizo naupang pawngsualtu an man vat chu MZP chuan lawmawm a tiin, a phutawk hremna pek a nih ngei a phut tlat a. Hetiang thil duhawmlo hi thleng nawn tawh lo se a duh tak zet bawk a ni.

Tin, tukin zing dar 7:45 vela Thingdawl naupang kum 2 leh thla 10 mi Malsawmtluangi, Pu Lalngaihzuala fanu Thingdawl khua, Tank Lorry-in a chilhlum chu MZP chuan pawi a tiin, he Motor khalhtu hi hnamdang niin, fimkhur loh vang liau liau a he thil hi thleng a niin a lang a. Fimkhur lo taka he motor khalhtu hi MZP chuan a dem tak zet a, a phu tawk hremna pek a nih ngei a phut tlat bawk, lusun chhungte thinlung takin MZP chuan a tawrhpui a ni.



(LALSANGZUALA NGENTE)
Asst General Secretary

MZP Press Release 16th April, 2010

Dt 12 04 2010-a West Kawnpui Bazar-a 4th IR Battalion Driver R.Pazawna’n tihpalh thil liau liau a mi pakhat a chilhlum chungchanga 4th IR Commandant in ZONET kaltlanga a thusawi chu MZP chuan thu dik tawk lo a ni tiin, hetianga thudik tluantlinglo puanzar a ni hi a dem takzet a ni.

He thil thlenna hmun ‘West Kawnpui thlang lama Tripura ram lam bazar bulah’ a tih hi, thu diklo niin, Mizoram chhung ngei zawk kan humhalh leh enkawl mek a ni. Tripura leh Mizoram inrina hi kawngpui lai takah ti a sawi thin a ni a, he thil thlenna hmun hi Mizoram lam kawngsir thir ban tlu-awn bulah a ni. 4th IR truck hian helai hmun a thlen lai hian kawnglai takah motor dang (truck) a din tlat avangin hemi hel tura kawngsir veilam (Mizoram lam)-a a kal hian kawngsir a thirban tlu-awn a lo thu mek zinga mi Suman Das-a insaseng tur thirban rap pial chu tlu lutin motor ke hnung vei lam in a lu ah a chil ta a ni. A bula lo dingte thawm hriain Driver Pazawna hian motor hi tidingin a hnungtawlh leh a, Suman Das-a hi lachhuakin a nunna chhan tuma an beih ngial hnuah a chatthla ta a ni. Hetiang thil a thlen takah hian R.Pazawna hi tualchhung mipuiin umzuiin kut an thlak zui ta a, a sa himna zawngin a bul hnai ber Tripura Police Outpost-ah a tlanlut nghal a. Lo chhan ahnekin kut an thlak chhunzawm nghal a ni. Hemi chungchanga Tripura Police leh mipuiten kut an thlak miahlo anga thu diklo tarlan a ni chu thalo a tiin, mahni naute chhanhim tumna aia hmai phihfai nana an dinhmun tihchhiat leh zual tumna ah MZP chuan a ngai a ni.

He thil thlennna hmun hi Mizoram chhung ngei a nih anga Mizoram Police zawkin mawhphurhna la lova, Tripura Police te kuta Mizopa himlo taka a awm kha MZP chuan a dem takzet a, R.Pazawna bail-a lakchhuah a ni erawh a lawm em em rualin a case Mizoram Police kuta a awm ngei MZP chuan a duhin, mahni ram chin humhalh leh enkawl kawngah Mizoram Police te chak taka hma la turin a ngen nghal bawk a ni.
Hnam dangten an ramchin humhalh tura theihtawpa hma an lak lai leh chumi kawngah an sipaite thlavang na taka an hauh lai a, mahni ram hloh zawng leh Mizote thiamloh inchantir zawnga thu thehdarh a ni hi a demin, hetiang thil hi thleng nawn tawhlo se MZP chuan a duh takzet a ni.
Tin, kan ram chin humhalh nan leh tawhsual tawh palh kawnga Mizote him nan Kawnpui-a Police Beat Post pawh Station puitlinga thuamthat a nih thuai MZP chuan a duhin Mizoram sorkar a ngen tak meuh a, he thilthleng hi min ti harhtu ah hmangin Mizote a vanduai zawk leh tuartu zawka kan tan zel lohna tura hna thawh nghal nise a duhin, atul ang zelin MZP chuan a umzui zel dawn a ni.





(LALSANGZUALA NGENTE)
General Secretary

MZP Press Release 14th April, 2010

MZP General Headquarters Executive Meeting chu Vawiin Dated 14th April 2010 dar 11:30 AM -khan MZP Pisapui-ah neih a ni a. Meeting hi Pu VL. Krosshnehzova President in kaihruaiin Pu LZ. Tochhawng ECM chuan hunserh a hmang a. MZP hmalakna hrang hrang reports meeting ah hian ngaih thlak a ni bawk.

MZP chuan dt.22.4.2010 a Technical Course hrang hrang zirtur thlanna Entrance Exam- neih tur chu kum dang a buaina kan tawh thinte thleng tawh lova felfai taka exam buatsaih a, a rang thei ang ber a result tichhuak turin a duh a, tuna seat kan neih hi a beitham in zirlai zir duh tamtak seat changlo an tam em em a, seat tam zawk kan neih theih nan a hma la turin Mizoram Sorkar leh Department a ngen a ni. Tin, seat kan neihna tamtak hi Private Institution a ni a, hengah hian zirlaite tan senso a hautakin nu leh pate tan pawh phurrit a ni a, seat neih belh kawngah pawh senso hautak lohna Government Institution dap turin Mizoram sorkar MZP chuan a ngen bawk a ni.

Meeting chuan MZP Assembly 2010 thlenna hmun tur atan MZP Headquarters Zawlnuam a ruat a, he hunah hian MZP din cham vawi - 75na(Platinum Jubilee) lawm na hun hman tur a ni bawk.
Meeting chuan “Separate Time Zone for Northeast” Seminar chu ni 23 April 2010 chawhma dar 11:00 ah Vanapa Hall- a hmang turin ruahmanna a siam a, he hunah hian Pu Lal Thanhawla Chief Minister chu Khuallian niin, Pu Benjamin-a IDAS, Registrar Mizoram University chu Khualzahawm a ni ang. Tin, Pu Jahnu Barua Padma Shree Awardee, Guwahati- hmarchhak chungchang kum tam tak lo zir tawh chu Resource Person tur a ni ang a, Mizoram University Geography leh Economics Deptt. atangin an thlir dan ngaihthlak a ni bawk ang. MZP in a thawhpui hmarchhak State hrang hranga zirlai hruaitute he hunah hian lokal tur a beisei an ni a, North East Students’ Organisation(NESO) hruaitute pawh tel tura beisei an ni bawk.

Meeting hi Pu Zion Lalremruata, NESO Council member- in Pathian hnenah tawngtaina neiin a tin a ni.





(H.LALREMSIAMA)
Secretary

MZP Press release 13th April, 2010

MZP-in Zorun a lo sak tawhna hmun, MZP ramah ni 10th April, 2010 khan hnamdang miten mau hmangin an rawn hung a, balhla te hial an rawn phun ngam ta mai hi inhmuhsitna leh intham lohna lian takah MZP chuan a ngai a. MZP chuan kum 2007-a Zorun a lo sak tawhna hmun, Vairengte daiah State pawn lam mi ni ngeia hriatten mahni ram chhung ang hrima an rawn cheibawl a, kut an rawn thlak hi a dem takzet a ni.

Sub-Headquarters, Vairengte chuan he thil thleng hi an hriat veleh a hmun ngeiah zu kalin an zu enfiah nghal a, MZP Gen. Hqrs chuan a tul ang anga hma lak inhuam chungin Sorkar a dawr nghal a. MZP-te ngenna ngaipawimawhin thuneituten rang taka hma la nghalin, 12th April, 2010 chawhnu lam khan a hmun hmate zu enfiahin a hungna an zu thiat nghal a ni. He thil thleng chungchanga kan police- te hma lakna hi MZP chuan thlamuanthlak a ti a, ram leh hnam humhim nan theitawp chhuah chhunzawm zel turin Sorkar a ngen nghal a ni.

2. Nimin 12th April 2010 khan Mizoram chhung W. Kawnpui khuaah 4th I.R Battalion driver R. Pazawna chuan hnamdang mi chu vanduaithlak takin a chil hlum palh a. R. Pazawna hian a thiam lohzia inhriain Kawnpui, Tripura Police Outpost-ah a in-report nghal a, police-te hian kut an lo thlak mai bakah mipuiten kut an thlak theih turin an hruaichhuak a. Mipuite pawhin kut an thlak nual a ni. He thu hi Mizoram police-te pawhin hriain kan ram chhung a nih angin, Tripura police-te hnenah R. Pazawna hi an kuta hlan turin an dil a, nimahsela, vawiin thleng hian an la hlan phal lo a ni. Hemi chungchanga Tripura police-te thiltih dan hi MZP chuan a dem hle a, R. Pazawna hi a rang thei ang bera Mizoram police kuta hlan hi a phut tlat a ni. Mizoram police-te pawhin an thuneihna chin hriaa R. Pazawna hi la let tura theitawp chhuah chhunzawm zel turin a ngen a, chutih rualin Mizoram Sorkar pawhin kan ram chhunga thil thleng ngei a ni tih hriaa a tul anga hma la turin MZP chuan a ngen a ni.





(H. LALREMSIAMA)
General Secretary