MZP Press Release 22 june 2010

Vawiin Dt 22 6 2010 khan MZP Gen Hqrs chuan MZP kum 75-na (Platinum Jubilee) lawmna atan a hmalakna hmasa ber ‘Jubilee Thingphun’ hnatlang Mizoram Secretariat Complex-ah Divisional Forest Office, Aizawl nen tangkawpin neih a ni a. Platinum Jubilee hawnna programme hi Pu S.Lalrinawma Vice President-in kaihruaiin Pu VL.Krosshnehzova President chuan a hawnna hun hmang in, “Mizoramah hian thingtiak hi kan phun nasa tawhin a enkawl zui leh lam kan ngaihthah thin a, kan phun zawng zawng hi nung vek sela chuan phun belh vak hi a ngai tawh lovang, chuvangin MZP chuan Jubilee Thingphunte hi a enkawl zui zel dawn a ni, a phun tam lam aiin enkawl zawh tawk a phun dawn a ni” a ti a. Tin, Platinum Jubilee lawmna hi hemi chauh hi a ni dawn lova, hma chhawp hrang hrang organising committee-in a duangin a kalpui chho mek zel a ni tih a sawi bawk. Pu V.Lalfala DFO, Aizawl chuan thusawina hun hmang bawkin MZP nena hetiang thawh hona tha neih hi lawmawm a tih thu leh midangte tana malsawmna rilru pu a ram tana thil tangkai hnuchhiah/siam duhna rilru MZP-in a pu hi ropui a tih thu a sawi bawk.Thingphun tur leh thil tul zawng zawng buaipuite DFO, Aizawl-te chungah MZP chuan lawmthu a sawi bawk a ni.

Platinum Jubilee Thingphun hnatlangah hian MZP Gen Hqrs hruaitute bakah hruaitu hlui thahnem tak an thawkchhuak a. Tin, All Manipur Student Union atangin James Bond, President leh S.Rakesh Singh, Adviser ten an rawn tawiawm bakah MHIP atangin General Secretary hovin an rawn telpui bawk a, hnatlanga thawkchhuak zawng zawng hi mi 45 an ni. MZP hmangaihna thinlung pu tlattu hruaitu hluite leh he hun rawn hman pui tute chungah hian MZP chuan thinlung takin lawmthu a sawi a ni. He hunah hian thingtiak thahnem tak phun niin, a enkawl zuina ah pawh MZP chuan theihtawp a chhuah dawn a, mipuite pawh a enkawltu kan nih theihloh pawhin a tichhetu nilo hram turin MZP chuan a ngen nghal bawk a ni.


(H.LALREMSIAMA)
General Secretary

MZP Press Release 21st June, 2010

Mizo Zirlai Pawl chuan Pathian kaihhruaina hnuaiah kum 75 (Platinum Jubilee) alo thleng chho dawn ta a, a puala hun hawn nan Ni 22nd June 2010 hian MZP chuan Thing a phun dawn a, he hunaah hian General Headquarters Executive Committee Members, College Students’ Union leh Hnampual zirlai te tel vek tura beisei an ni. He hun a kal tur zawng zawng te’n thing phun na hmanrua (Tuthulh, Thirtiangte leh Chem)ken theuh tur a ni a, zing dar 10:30 ah New Civil Secretariat complex-ah kim tur a ni.

Mizo Zirlai Pawl kum 75-na (Platinum Jubilee) hi a theih ang leh remchan dan ang a lawm zel tum a ni. Ruahmanna engemawzat siam tawh a ni a, lawmna leh hriatrengna thiltih hrang hrang ah MZP hruaitu hlui leh Hnampual hruaitu leh College zirlai leh hruaitu lo ni tawh zawng zawngte inthlahrung hauh lova tel zel turin MZP chuan a ngen in a sawm tak meuh a ni.






(Peter Chhangte)
Secy i/c. Publicity

MZP Press Release 14th June, 2010

Mizoram a tlawmngai Pawl lian ber Young Mizo Association (YMA)-in kum 75 (Platinum Jubilee) Pathian hruaina-a a lo tling ta hi MZP chuan thinlung takin a lawmpui a, he Ni hi Zoram hmun hrang hrangah tluang taka hman a nih theih nan duhsakna a hlan bawk a ni. YMA hi tanpui ngaite tanpuitu niin mi chhumchhia leh dinhmun harsa zawk tan innghahna a lo ni thin a, tun thlengin he zemawi tak hi chhawm nung zelin Pathian pawhin mal a sawm zel niin MZP chuan a hria a. Kum 75 zet Zonunmawi chhawm nung tlattu Mizoten kan nei hi a vanneihthlak tak zet a, hun lo kal zel turah pawh zofate tan chawlhna Inpui ni zel turin MZP chuan thinlung takin duhsakna a hlan tak meuh a ni.

Tunlaia Electoral Roll Summary Revision neih mekah dik leh felfai taka tih a nih MZP chuan a duh tak zet a. Party hamthatna um a mi diklo chung Elactoral Roll-a thunluh tumna ang chi reng reng chu MZP chuan a do tlat a ni. Hetiang a awmlohna tur hian tlawmngai pawl hrang hrang leh MZP te chuan tun hma atangin thahnemngai takin hna a lo thawk tawh thin a. Hemi avang hian mi diklo tak tak Electoral Roll-a thunluh tum pawh dan an lo ni tawh thin a ni. Tuna he hna kalpui mekah hian thawktu zawng zawngte fimkhur tak leh dik taka hna thawk turin MZP chuan a ngen tak meuh a, hmun hrang hrang a tlawmngai pawl leh VC leh MZP Headquarters/Sub-Hqrs/Branch leh Hnampual Zirlai zawng zawngte pawh he hna kalpui mek hi lo enpuia a tul anga hma lo la zel turin MZP chuan a ngenin a hriattir bawk a ni.





(H.LALREMSIAMA)
General Secretary

MZP Press Release 11th June, 2010

MZP chuan Zirlaite tan a theih ang angin zirna sang zawk an chhunzawmna turin hma a la chhunzawm zel a, hemi kawnga hmalaknaah hian Mizoram Youth Commission chuan chak taka a umzui avangin leh theihtawp chhuaha hna an thawhnaah lawmthu a sawi tak meuh a ni. Tunah hian a hnuaia tarlan hrang hrang ang hian Engineering zir tur tan Mizoram in Qouta kan neihlohna hmunah seat hmuh a ni a, heng seat hnawhkhat tur hian dt.18 June 2010 ral hma ngeia tihfel a ngai a ni. A zir duh tur Class XII Science pass zirlaite tan Mizoram Youth Commission Office-ah leh MZP Office ah ngaihven theih a ni.


B.E. Electronics and Communication Engineering : 5 Seats
B.E. Electrical and Electronics Engineering : 5 Seats
B.E. Computer Science Engineering : 2 Seats
B.Tech. Information Technology : 5 Seats

Tunah hian B.Tech (Petrochemical Technology) zir turin mi 8 tan admission tihfel tawh a ni.



(H.LALREMSIAMA)
General Secretary

MZP Press Release 10th June, 2010

1. Mizoram a zirna-in hma a sawn zelna tur leh zirlaite’n hun tam zawk zirna an dawn theihna turin zirna kawnga hna thawkten thil tul dang an ngah lutuk thin chu sutkian sak nise MZP chuan a duhtak zet a, hemi avanga zirlaiten an zirna kawnga harsatna an tawh nasat dan hi ngun taka ngaihtuahin a uiawm em em a ni. Sawrkar hna an thawh tlansana mimal thil an khawih mai pawh nilo Kohhran leh khawtlanga in hman kawngah pawh ngaihtuahna zau zawk senga zirna tibahlah lo turin hun hman thin nise a duh takzet a ni. Mahni hnathawh(Sawrkar hna) lai kalsan a thil dang thawk turte pawhin dan angin chawlh la thin turin a duh takzet a, hei hian inrelbawlna fel zawk pawh a hrin chhuah ngei a rinawm a ni. Mahni hna rinawm taka thawh hi Mizo zia a nih angin Pathian duhdan a nih ngei pawh MZP chuan a ring tlat a. Hemi chungchangah hian Mizoram Sawrkar chu a hnathawkte enkawl kawngah zirlaite dinhmun hre rengin zirna tha leh tam zawk kan neihna tura huai taka hma la turin MZP chuan thinlung takin a ngen a ni.

2. Rashtriya Madhyamik Shiksha Abhiyan (RMSA) hnuaia School hrang hrang sak that tura ruahmanna awm mek ah sum bothlau awm lova tha tak leh dik taka kalpui a nih ngei theihna turin MZP chuan thuneitute hma la turin a ngen tak zet a. School Building chhe tawh tak tak Mizoram sorkar-in a sak that theih si loh hmun hrang hrangah a awm a, hetiang hi kan dinhmun a nih mek lai a, RMSA atanga sum thahnem tak High School 154 sakna tur lokal hi MZP chuan vanneihthlak a ti a. Heng sum lokalte hi kan ram dinhmun hre reng a, school sak that a har zia hria a, ruahman a nih anga hnathawh a nihna tur leh kan ram rohlu a nih theihnghilh lova hnathawktu tur thlanna kawngah pawh fimkhur leh dik taka thlang turin Mizoram Sorkar chu thinlung takin a ngen a, heng hnate endik tura Monitiring Cell a buatsaih pawhin a tihtiurte huai tak leh tlin takin thawk se a duh takzet a. Heng sum tam tak senralna tur hi a theih ang angin MZP chuan a enzui zel dawn bawk a ni.

3. Tun hnaia Assam Sawrkar nen ramri chungchanga boruak leng mek chungchangah Vairengte daia BRTF(Pioneer) ho hmun chhuahsan chu Assam Sawrkarin a police-te hmangin a luahlum mai ang tih MZP chuan a hlau a, hemi chungchangah hian kan ram chin humhalhna kawnga hmalakna kal mek tibahlah thei tura thil thui tak thlen theitu a nih avangin Mizoram Sawrkarin he hmun hi kan luah lum ngeina tura hmalak nghal nise a duh takzet a. Kan ram chin humhalh tura hma la zel turin Mizoram Sawrkar a ngen nawn leh a ni.


(H.LALREMSIAMA)
General Secretary

MZP Press Release 9rd June, 2010

Vawiin dt. 9.6.2010 chawhnu dar 1:00 PM hian MZP General Headquarters, Executive meeting chu MZP Pisapui-ah neih a ni a. Pu VL.Krosshnehzova President-in meeting hi a kai hruai a. Pu L.Ramdinliana Renthlei Secy. i/c. Property in tawngtaina hun a hmang.

Meeting-ah hian reports hrang hrang zin reports leh MZP hmalaknate ngaihthlak a ni.

Meeting chuan Mizoram Sorkarin tunhnaia Hindi Teacher lakna a kalpui mek leh zirtirtu dang lak tur a buaipui mek chu dik leh felfai taka lak nise, induhsakna thiang hlimlo hmang a he hnalak hi kalpui anih lohna turin leh written test neih a nihna turin hmalak nise a ti a. He hna lak turah hian lak an nih anga thawk tha tur leh zirlaite harsatna sukiang tur lak an nihna turin thiamna in angah chuan a khaw mi lak MZP chuan tha a ti a. Tin, heng zirtirtu atan a lakte hian hnathawh tura lak an nih ang ngei a an thawh theih na turin MZP chuan a enzui reng dawn a ni.

Mizoram leh Assam inkar Vairengte daia sorkarin Mizoram chhunga kawng siam that hna a kalpui mekah Lailapur All Political party meeting in kan ramri tiderthawng zawnga thuchhuah an siam hi MZP chuan a dem tak zet a, ram ri chung changah hian sorkar hi tlawm mai lova ramri humhalh nana huaitaka kal turin kan ngen a, kan ram humhalh turin MZP chuan ke pen a in huam reng a ni.

Technical Entrance Exam result MZP te’n kan ngenna avanga enthat a ni leh result hlawhtling tak a tih chhuah a ni leh ta chu MZP chuan lawmawm a ti hle a ni. He mi chuang changa endik hna thawktu te leh sorkar chungah MZP chuan lawmthu a sawi tak meuh a ni. Result thar hmanga allotment siam turah dik leh felfai taka kalpui a nih theih nan MZP chuan hma a la zui zel dawn a ni.


(H.LALREMSIAMA)
General Secretary

MZP Press Release 3rd June, 2010

MZP chuan Technical Entrance exam 2010 result vawi thumna Dt. 2/6/2010 tlai dar 4-a tih chhuah leh a ni chu lawmawm a ti a. Result diklo siam fel tuma beitu zawng zawngte thawhrimna ah MZP chuan lawmthu a sawi a ni.

Technical Entrance result chhuak leh atanga a lan danah hian result hmasa a dik loh zia a lang chiang hle-ah MZP chuan a ngai a, result chhuah nawn leh hi a dik tawh ngei a beisei a ni. Tuna result chhuak leh hi MZP chuan ngun takin a zir chiang leh dawn a, a diklo hmuhchhuah leh a nih chuan zirlaite’n an chanvo diktak an chan theih nan theihtawp chhuahin hma a la leh dawn a ni.

Result tih chhuah leh hi a dik a nih chuan zirlai tling te’n a hun taka zirna an tan theih nan hnathawktute chu Allotment siam chungchangah muangchang lo turin MZP chuan a ngen a. Tin, zirlaite’n an zirna hmun tur an thlan turah dik tak leh fel fai tak a ruahmanna kalpui nise tha a ti a, Allotment chungchangah hian buaina a awm lohna turin langtlang taka thil tih nise MZP chuan a duhin, thawktute pawh hemi kawngah hian hma la turin a ngen nghal bawk a ni.




(H.LALREMSIAMA)
General Secretary

MZP Press Release 31st May, 2010

1. MZP chuan Dt 25.5.2010-a Union Home Minister-in Mizoram a rawn tlawh denchhena Memorandum a thehluh - Calcutta leh Delhi khawpui a Mizo zirlaite tana Hostel ruahman sak, North East zirlai a bikin Mizo zirlaite himna ngaihtuah leh, Tuikuk anmahni duhthu ngeia Mizoram chhuahsan tute thlavang chauh hauh lova Tuikuk ngeiin an umchhuah Sakhan tlangdunga Mizote leh Assam atanga helin an umchhuah kan unau Hmar te thlavang ngaihtuah ve tura a ngenna chu a tak ram a thlennna turin MZP chuan theihtawp a chhuah zel dawn a ni.

Union Home Minister-in Mizoram rawn tlawh ve inti si a, Mizo mipuite hmuhna hun tlemte pawh buatsaih lova, chanchinbu mite takngial pawh hmu lova Tuikukte tana hun a siamsak lawi si chu MZP chuan a hrethiam lovin, Central sorkar-in hnam hnufual a ngaimawh dan chu thliar bik nei ah MZP chuan a ngai lo thei lova, Mizote Home Minister nilovin Tuikukte Home Minister chauh em ni a nih tih hi MZP zawhna a ni.

2. Dt 30.6.2010-a Health Worker Training tur lak tura written test Mizoram sorkarin a buatsaih tur chu MZP chuan ngun taka a thlirin felfai tak leh thliar bik awm lova he exam hi buatsaih nise a duh tak zet a ni. Exam na hmuna exam tur tam avanga buaina awm theite, exam endik kawnga harsatna awm thei laka fihlim ngei turin a buatsaihtute chu thinlung takin MZP chuan a ngen a. Zirlaite thiamna haichhuak a, dik leh felfai taka he exam hi buatsaih a nih ngei MZP chuan a duh tak zet a ni.

3. MPSC-in exam lian tham leh hautak tak a buatsaih thin kawnga an harsatna sutkian nan Optical Mark Reader lei tura Mizoram sorkar a ngenna chu tihhlawhtlin a ni ta hi MZP chuan lawmawm a tiin, he khawl hmang hian exam changtlung leh felfai tak buatsaih a nih tawh ngei a beiseiin, sorkar pawhin hman a nih thuai theihna tura chak taka hma la tur leh a enkawl chhunzawm zelna turah fimkhur leh uluk taka enkawl turin a beisei tlat a ni.



(PETER CHHANGTE)
i/c Publicity

MZP Press Release 28th May, 2010

Mizo Zirlai Pawl (MZP) chuan MBSE hnuaia compartmental exam neih thinah marksheet-a ‘Compartmental’ tih inchhu tel thin, kumin atanga thaibo a ni tur chu lawmawm a ti a, zirlaite pass-na marksheet-a compartmental tih inziak tel thin hian zirlaite an zir chhunzawm zelna atan admission-ah leh hna dil kawngah harsatna a thlen thei tih hria a, MZP ngenna te ngai pawimawh a zirlaite hmakhaw ngaia MBSE in dan thar a siam hi MZP chuan lawmawm a ti in thawktute chungah lawmthu a sawi tak meuh a ni.


(Lalsangzuala Ngente)
Asst. General Secretary

MZP Press release 26th May, 2010

MZP chuan vawiin Ni 26th May 2010-a MBSE in HSLC 2010 compartmental exam result hun reilote chhunga MBSE-in a tichhuak chu lawmawm a tiin, thawktu te thawhrimna leh inpekna ah lawmthu a sawi tak zet a ni.

Zirlai hlawhtling tharte chungah MZP chuan thinlungtakin a lawmpuia, an kal leh zelna turah duhsakna a hlan tak meuh a ni. Chutihrualin tun tuma la hlawhtling zolo te chu beidawng mai lova an zirlaite chhunzawm leh tur leh beiseina thar nena zir a, hlawhtlinna hmu ngei turin thinlung takin a chah bawk a ni.





(H.LALREMSIAMA)
General Secretary

MZP Press Release 25th May, 2010

MZP chuan hun rei tak chhung kan thenawm State Nagaland leh Manipur inkara buaina awm avanga National Highway danchah a a awm chu ngun taka a thlirin pawi a tiin, an inhriatthiam lohna te chinfel a nih na turin theihtawp a hmalak tha a ti a. He inhmuhthiam lohna avanga mipuite harsatna tawhmek chu sutkian thuai tha a ti a ni. Hemi chungchanga a hmalakna turah tlawmngai pawl hrang hrang leh Political Party hrang hrangte nena sawihona hun dt.27.5.2010 hian MZP Pisa Pui-ah a buatsaih dawn a ni.

Tin, MZP chuan UPSC in Exam a buatsaih hmachhawn tura Mizoram Youth Commission-in Coaching a buatsaih tawh chu tawpsan mai lova, hun lo kal zel turah pawh zirlaite tan buatsaih leh se a duh tak zet a, Staff Selection Commission te’n Exam an buatsaih thin hrang hrang te hmachhawn tura inbuatsaihnan Coaching buatsaih nise tha a tiin, chak taka hmalak zel MZP chuan a tum a ni.




(H.LALREMSIAMA)
Secretary

MZP Press Release 21st May, 2010

Vawiin Ni 21 May 2010 chawhnu dar 1:00 khan MZP Executive Meeting chu MZP Pisapui ah neih a ni a. He hun hi Pu VL Krosshnehzova President chuan a kaihruai a ni.

Meeting ah hian Zirlai titha chawimawina MZP Sub-Headquarters, Tlabung ten Ni 14 May 2010- a an buatsaih a kal MZP General Headquarters hruaitute, Lunglei Congress Thalai Pawl ten an lo haw lampang an lo tihbuai chungchangah nimin Ni 21 May 2010- a LDYCC ten thuchhuah an siam leh chungchang chu meeting chuan ngun taka a ngaihtuah hnu in chhan tlak ah a ngai tawh lova, hun remchang hmasa ah MZP Sub-Headquarters Tlabung tlawh hian lamkal intirh nise meeting chuan a ti.

‘Census of India’ in India ram puma chhiarpui a neih mekah, Mizoram a he chhiarpui hnathawk tur hian Mizoram chhunga Sawrkar Sikul hrang hranga zirtirtu thahnem tak chhawr an nih avangin Sikul tamtak ah zirna a khaihlak phah nasa hle a. Hei hi MZP chuan tha a ti lovin zirlai ten an chanvo dik tak zirna tluang taka an neih theih nan Census tih nan sum tam tak ruahman a nih angin, ruahmanna siam thuai turin thuneitute a ngen a ni.





(H.LALREMSIAMA)
General Secretary

MZP Press Release 20th May, 2010

MZP chuan Zirlaite Hairstyle, Uniform, Tattoo leh Mobile phone chungchanga an zirna tibahlah thei leh, harsatna thlen theitu a nih hria in rawtna chi hrang hrang Mizoram Sorkarah alo thlen tawh a ni. He rawtna bawhzui tur leh zirlaite tan a tangkai tur ruahmanna nei tura Sorkarin committee on Indecent School Dress and Hairstyle a buatsaih chu lawmawm a tiin, he committee hian zirlaite tana tha tur an duanchhuah ngei a ring tlat a ni.

He committee hian chak taka hma an lak ran tha a tiin, zirlaite tana tha tur a relchhuah leh bawhzui kawngah MZP chuan theih tawp chhuahpuia inhuam reng a ni.






(H.LALREMSIAMA)
Secretary

MZP Press Release 19th May, 2010

MZP chuan Technical Entrance Exam result ennawn leh hna kalpui mek turah dikna hailan anih ngei a duhin, hemi kawnga sorkar hmalakna kal mek chu beiseina sang tak nen a thlir mek a ni.

Ennawn lehna kalpui turah Chemistry Subject chauh Answer Key ennawn a, Subject dang chu Retabulation chauh tihtir a ni dawn ta hi tha lo a tiin, hei hian result diklo bawk min hlui leh a hlauhawm phah hle a ni. Ngun taka MZP-in a thlirin subject dang Answer Key pawh hi diklo thei niin a hria a, ennawn tel vek nise a duh takzet a, thil pahnihkhat lek a diklo pawhin diklo tho a nih avangin dikna a lal theihna turin subject dang zawng zawng Answer Key pawh check nawn vek nise a duh a, Chemistry chauh ennawn a nih a diklo dang hmuhchhuah a nih leh pawhin sorkar fimkhur tawk lohna ah MZP chuan a ngai dawn a ni.

MZU hnuaia hnalak kalpui mekah ram leilung fate thlauhthla zawnga ruahmanna siam a ni hi pawi a tiin, ram leilung fate dinhmun thlir tel lova thlauhthlak an nihna tura tehkhawng siam chawp a ni hi MZP chuan a duhlo tak zet a ni. MZU-ah hian equal opportunity awm tur a nih laiin, ram leilung fate thlauhthlak anni hi MZP chuan na a tiin, Mizo hnam tan himlo a ti hle a ni. Hemi chungchangah hian Interview kalpui mek pawh hi tih tawp nise MZP chuan a duh a, a hmalak tawhnate chhunzawmin Mizo hnam tan hma a la zel dawn a ni tih hi MZU thuneituten lo hria se a duh a ni.

Tin, Mizoram sorkar pawhin he hnalak kalpui mek hi ralthlir mai lovin siamthat a nihna turin hma la se a duh tak zet a, University thatna atana fehchhuak zirlai inpete Police ten an man hi mak a tiin, hetiang hi thleng tawh lo se a duh tak zet bawk.





(H.LALREMSIAMA)
Secretary