MZP Press Release 28th July 2010

Dt. 27th July 2010-a Vanglaini daily news paper Advertisement huang a ‘Short term degree course’ tih chu MZP chuan thil dik tawklo awm thei ni a a hriat avangin a chhui chiang a. Thuk zawk leh chiang zawka bawhzui turin vawiin 28th July 2010 khan Aizawl Police Station ah FIR a thehlut a ni.

He advertisement chhuah tu ten kum khat chhunga short term Degree Course Correspondence hmanga BA,B.Ed,B.Com,MA,M.Com,MSW te zir theih ang a a chhuah chu The Global Open University, Nagaland Prospectus nen inmillohna tam tak MZP chuan a hmuchhuak a ni. A course chhung kum khat tih pawh a nih loh thu te, course fee pawh to uchuak taka lak a nih thu te leh he University hnuaia Affiliated College ni a sawi ‘SREE SANKARA COLLEGE’ pawh a awm ngei leh awm loh a chhui mek a. Tin, admission hawngtuten course fee structure an tarlan na ah leh admission form-a college hming inziah dawn pawh a inmilloh thu a hmuchhuak bawk.

Hetiang zirna hmun puanzar kawngah zirlaite bum thei tur leh harsatna siam thei a lo awm fo tawh avangin zirlaite chu hetiang laka fimkhur tur leh sum tam tak seng a thil tih pawh chhuizauna nei hmasa zel turin MZP chuan a duh a. Tin, zirlaite sum duh avanga bum tur leh harsatna siam sak tawhlo tur institution te tumah rawn in zuar lo turin MZP chuan a hriattirin a ngen nghal bawk a ni.





(LALSANGZUALA NGENTE)
Asst. General Secretary

MZP Press Release 27th July 2010

India ram State hrang hrangah Pre-paid Mobile Roaming pek an nih laiin Hmarchhak State te tan erawh phalsak kan ni lova. MZP chuan hei hi Hmarchhak State te thlauhthlakna leh hmusitna ah a ngai a. India ram chhunga awm kan nih anga State dangte hamthatna ang mipuite’n kan neih theih nan theih tawp chhuahin hma lain Central Sorkar-ah pawh Pre-paid Roaming neih theihna tur hian vawi engemaw zat ngenna a lo thlen tawh a ni. Hei mai bakah hian North East Students Organisation (NESO) pawhin Hmarchhak State hrang hrangte’n Roaming kan neih theih nan hian chak takin hma a la a. Dt.19th July 2010 khan Ministry of communication and Information Technology chuan MZP leh NESO hmalakna zarah NE Circle 1 leh 2 tan Pre-paid Roaming min rawn pe ta hi MZP chuan lawmawm a tiin thuneitute chungah lawmthu a sawi a ni.

Tunah hian Telephone Company hrang hrang in Pre-paid roaming hi an pe tan mek a, amaherawhchu, he roaming hi North East chhungah chauh hman theih a ni a. India ram chhung khawi hmunah pawh hman a nih theih nan Dt.22 July,2010 a Mizoram rawn tlawhtu Shri Sachin Pilot, Union Minister of State, Communications and Information Technology, Government of India- hnenah MZP chuan a lo thlen tawh chu a hlawhtlin theih nan MZP chuan chak takin hma a la zel dawn a ni.

Tin, Ministry of Home Affairs hnuaia INDO-TIBETAN POLICE FORCE (Constable) lak turah India ram State hrang hrang 27(sawmhnih pasarih) leh Union Territory pakhat(Delhi) ten State Quata an neih laia Mizoram State- in Quota a nei ve lo chu MZP chuan hriatthiam har a ti tak zet a. Hei hian Central Sorkar-in Mizote min enhran zia a ti lang chiang hle ah MZP chuan a ngai a ni.Vawiin dt.27th July 2010 hian Mizoram Governor hnenah thil awmzia zawhfiahna leh Mizoram-in Quota kan neih ve ngei theih nan hma min laksak turin MZP chuan ngenna lehkha a thehlut a ni.





(H.LALREMSIAMA)
General Secretary

MZP Press Release 23th July 2010

MZP Platinum Jubilee puala Programme peng khat atan “Citizen Journalism and New Media” workshop chu Dt 23.7.2010 Dar 11:00 AM khan I&PR Conference Hall, Treasury Square, Aizawl-ah tan a ni a. Workshop hawnna hun hi Pu S.Lalrinawma Vice President-in kaihruaiin, Pu H.Lalremsiama General Secretary-in Workshop inbuatsaihna report leh inhmelhriattirna hun a hmang. Pu VL Krosshnehzova President chuan hawnna thuchah sawiin, “Hre sa leh thiamsa a piang kan awm lova, inzir zel tur kan nih angin mizoten thiamna leh finna hmangin khawvel eng kan hmachhawn a tul, he workshop hmang hian kawng khat tala hmasawn belh turin thahnem ngai takin i zir ang u. Mifate tihtheih ang Mizoten kan thei ve tih hriain an thawhrimna leh teirei peihna leh huaisenna te khum tura kan beiha tul takzet a ni. Engpawh ti ila hnam min dintu in hnam tana min dinchhan hre rengin hnam rilru pu chungin i bei zel ang. Nang leh kei hian Mizoram leh hnam tan mawh kan phur si a” tiin kalkhawmte fuih chungin he Workshop hi a hawng a ni.

Citizen Journalism and New Media Workshop hi MZP Gen Hqrs leh Grassroot Development Network nen tangkawpa buatsaih a ni a. Workshop-ah hian zirtirna pe turin phai lam atangin Babul Gogoi, Foundation for Social Transformation (FST)fellow, Syed Miraj Ahmed, Assamese Time, Journalist, Prasenjit Sen, Amar Khaban Mysmenews, Journalist, Amal Roshan, Mahiti Bangalore, Lingraj G, Mahiti Bangalore an lo kal a ni.

Workshop-ah hian Mizoram University-a Master of Social Work (MSW) zirlaite, College hrang hrang Magazine Editor leh Asst Magazine Editor, Hnampual Zirlai hruaitute, PRISM, Grassroot Development Network leh MZP atangin mi 50 vel an kal a ni.

He Workshop-ah hian mipuiten thuthar thehdarh kawnga kan tihtur hrang hrangte engtianga thehdarh tur nge, eng chin hi nge puanzar tur tih te zirho a ni a. Tin, tunlai hmanraw chhuakthar Mobile, Internet, Digital Camera etc hman tangkai dan leh pawimawhna hrang hrang mithiamte hnen atang hian ngaihthlak a ni. Workshop a kal ten hlawkthlak an tiin bengvarthlak an ti hle.
Citizen Journalism and New Media Workshop hi India ram hmun hrang hrangah neih a lo ni tawhin, Mizoramah hetiang lam inzirtirna hun neih vawi khatna a ni a. Hetianga zirlaite leh thalaite tana tangkai tur buatsaih a ni hi MZP chuan vanneihthlak a ti hle a ni. Workshop hi naktukah neih leh a ni ang a, tlai dar 2:00-ah a kharna hun hman a ni ang. He huna tel zawng zawngte hnenah hian Certificate hlan a ni ang





(H.LALREMSIAMA)
General Secretary

MZP Press Release 22th July 2010

MZP chuan North East Students Organisation (NESO) hmalakna kal zel chhunzawmin Central Sorkar in North East Area tana Mobile Telephone (Prepaid) tana Roaming facilities a awm theih nan Central sorkarah ngenna a lo thlen tawh a ni. He a ngenna bawhzui nan hian Mizoram tlawha lo zin Shri Sachin Pilot, Union Minister of State for Information and Communication Technology hnenah lehkha lo thehlut lehin, NE Area ten harsatna kan tawh mek chu chingfel a, Prepaid Mobile hmangtute tan Roaming facilities chu pe ngei turin a ngen a ni.

Prepaid hmangtute tana Roaming facilities pek loh chhan hi venhimna kawnga thiltha zawk duh vanga sawi a lo ni tawh thin a, hei hi MZP chuan chhuanlam tlingah ngai lovin Prepaid hmang dangte chenna hmuna helna leh inrikrap tam zia a hmuhin, North East mipuite hrekbehna hmanrua maiah he chhuanlam hi a ngai a ni. India ram pum inpumkhatna leh inunauna chhawm nun nan inbiakpawhna tha a pawimawh zia hria a MZP ngenna hi tihlawhtling ngei turin a beiseiin, hemi kawngah State sorkar pawh theih tawp chhuah turin MZP chuan a ngen nghal bawk a ni.
Tin, MZP leh Grass Root Development Network tangkawpte chuan MZP Platinum Jubilee pualin nihnih awh “Workshop on Citizen Journalism and New Media” chu Dt 23rd & 24th July 2010 hian I&PR Conference Hall-ah a buatsaih dawna, he hunah hian a tui mite tel turin MZP chuan a sawm tak meuh a ni.


(H.LALREMSIAMA)
General Secretary

MZP Press Release 19th July 2010

MZP chuan Dt 18.7.10 zana hnamdangin Mizo Tlangval Roland-a (20) S/o Lalramthanga, Challui Veng, Kolasib rawng taka an that chu a dem tak zet a, tualthattute hi zawngchhuak ngei tur leh an phu tawk hremna pe ngei turin thuneitute a ngen a ni. Lusun chhungte thinlung takin a tawrhpuiin, Pathianin awmpui zel se MZP chuan a duh tak zet bawk.

Hemi zan veka Mizo Nu-in Lailapur bula rawng taka pawngsual a tawk chu a demin pawngsualtute hi man chhuaka hremna pek ngei an nih MZP chuan a phut bawk a ni.
Tin, tunhnai maia Assam mi leh sa ten kan ram chhung Vairengte daia kut rawn thlak a, a hung hna an rawn thawk leh ta mai chu demawm a tiin, hemi mai nilovin Forest Reserve Area chhung Teak kara In an rawn sa tih a hriatin hengte hi dan lova khawsa annih avangin an chunga hma lak nghal nise a duh takzet a ni. Mizoram Sorkar hnenah ngenna a thlen tawh angin MZP chuan tihlawhtling nghal se a duh tak zet a ni. Kan ram chhunga kut thlak tute chhan let kawngah huaisen taka che turin MZP chuan Mizoram Sorkar chu a beisei tlat bawk a ni. Mizoram Sorkar kut tihchak a tul a nih chuan MZP chu engtiklai pawhin a inring reng a ni.





(H.LALREMSIAMA)
General Secretary

MZP Press Release 15th July 2010

MZP General Headquarters chuan MZP Platinum Jubilee lawmna peng khat atan hruaitu hluite pualin “ Titi hona” hun naktuk dt.16th July, 2010 zan dar 7: 30 hian I&PR Auditorium, Treasury Square Aizawl-ah neih a ni dawn a. He hun hi Pu V.L.Krosshnehzova, President in a kaihruai anga, MZP hruaitu hlui Rev. C.Lalbiakhluna Chaplain, Presbyterian Hospital-in hunserh a hmang anga, H.Lalremsiama, General Secretary in report pe in, S.Lalrinawma, Vice President chuan tlangkawmna hun a hmang ang.

“Titi hona” hunah hian MZP hruaitu lo ni tawh zawng zawngte sawm an ni a. He hun hi hruaitu hlui a duh a piang tan mahni hunlaia MZP hnathawh, Mizo hnam leh MZP; tuna MZP kal dana thurawn leh mahni vei zawngte sawina hun hawn a ni ang. Tin, Platinum Jubilee puala Souvenior Sub-Committee- in a buatsaih Platinum T-Shirt, Pen, Saum bur. etc tlangzarhna hun Pu PC Zoram Sangliana, Ex-General Secretary in a hmang bawk ang. He programme hmang tur hian MZP hruaitu lo ni tawh zawng zawngte in hriatkim a harsat avangin sawmna lehkha dawng lote pawh he hun ngai pawimawh a rawn tel vek tura hriattir leh ngen in ni e.




(PETER CHHANGTE)
Secy i/c Publicity

MZP Press Release 12th July 2010

MZP General Headquarters chuan India ram State hrang hrang te Football-a inelna lian ber a Mizoram State aiawh turte vawiin Ni.12 July, 2010 a an fehchhuak leh thei ta hi lawmawm a ti hle a, Zofate India ram hmun hrang hrang club tha leh hluna khel thei kan pung chho zel chu thangtharte tan beiseina thar siamtu niin a chhuang tak zet a ni. Hetianga mahni ram leh hnam tana hlawkna um lova an khel thei hi MZP chuan a fak tak zet a ni.

Mizoram hmingthatna tura thawkchhuakte thahnemngai taka Mizoram tana khel tur leh hlawhtling ngei turin MZP chuan duhsakna a hlan a ni. Tin, thuneitute pawh ram tana fehchhuakte hi hamthatna kawngah changtlung leh zuala duat taka enkawl an nihna tura hma la turin a ngen bawk a ni.




(H.LALREMSIAMA)
General Secretary

MZP Press Release 8th July 2010

Central Board of Secondary Education (CBSE) zirlai thahnem takin harsatna an lo tawh thin, Class X & XII Compartmental Exam Centre Mizoram-a a awm loh avanga, centre hnai ber Silchar-ah exam thin a ni a. Silchar-a exam hi zirlaite tan a hautakin, thlenna chungchang leh thil dang tam takah harsatna zirlaite’n an tawk thin a.Heng harsatnate hi sutkian a nih a, Mizoram ngeiah Centre kan neih theih nan MZP chuan theihtawpin hma a la a. Kumin atang hian CBSE Regional Headquarters Gwahaty chuan Compartmental Exam Centre atan Kendrya Vidhyalaya School, Zemabawk chu thlan/ruat (approved) a nih thu an rawn chhuah ta a, MZP chuan lawmawm a tiin zirlaite tan mellung pawimawh tak niin a hria a ni.

CBSE Compartmental Exam Centre Mizoram-in kan neih theihna tur hian Mizoram Board of School Education (MBSE) thawktute hmalakna leh inpekna ropui a tiin zirlaite hamthatna tur atana an inpekna ah MZP chuan lawmawm a tiin lawmthu a sawi tak meuh meuh a ni.

CBSE Class X & XII Compartmental Exam hi July thla-ah Centre tharah hian neih a ni dawn a. Centre thar anih avang hian Central Board lam pawhin uluk takin an rawn thlir dawn a, chuvangin fimkhur leh uluk taka Exam Conduct tur leh dik leh felfai taka Centre dangte entawn tlaka thawk turin MZP chuan thawktute a ngen a ni. Tin, Exam bei turte pawh Centre thar ti hmingtha tura hlawhtlinna chang thei ngei tura tumruhna nena bei turin a chah a, hlawhtlinna an chan theihna tur hian duhsakna a hlan nghal bawk a ni.





Sd/-
(H.LALREMSIAMA)
General Secretary

MZP Press release 7th July 2010

Vawiin Ni 7 July 2010 chawhnu dar 2 khan MZP kum 75-tlin hriatrengna (Platinum Jubilee) Lung hawnna MZP Pisapui-ah neih a ni a. He hun hi Pu S.Lalrinawma Vice President in a kaihruai a, Pu J.Malsawma Ex-President-in a hawnna hun a hmang a, Rev C.Lianhmingthanga Ex-General Secretary-in hunserh a hmang a ni.

Jubilee Lung hawngtu Pu J.Malsawma chuan “MZP hi kum 1935 khan Shillong-ah a dinga Pu Buchhawna chu President hmasa ber niin hunharsa tak tak a tawng chhova. Kum 75 thlenga Pathian hruaina a dawng hi malsawmna ropui tak a ni. MZP in a mipuite hamthatna tura in thawh zawng zawngte hi ka lo hre thin a, pen chhuak thei tawh lo mah ila ka lo thlawp em em thin a ni. Ram leh hnam tan a hma inlakna turah fimkhur taka ngaihtuaha Pathian malsawm tlak a thawk zel turin ka chah che u a, duhsakna ka hlan tak zet a che u”.

He hunah hian Pu VL Krosshnehzova, President chuan thu sawiin, “Hetiang hun kan thlen theihna chhan hi Pathian min kaihhruaina vang a ni a, chumi hlawhtlinna awmtirtu chu hruaitu hlui kalta zawng zawng te anni. Pathianin MZP hi ram leh hnam tan leh ama rawngbawlna atana min pek a ni a, chumi hre lova a hlawkna umtu te chu an hah ru hle thin a ni. Pathian hian eng eng emaw kaltlangin ama rawngbawl turin min kova, keini pawh hi MZP kaltlangin a rawngbawl turin min ko a, ram leh hnam hmangaihna leh inpekna nen hruaitu hlui ten thawhrimna an sahkuak sa atang hian taima takin rinawmna nen i thawk zel ang u”, tiin member te a chah a ni.

Hunserh hmangtu Rev.C.Lianhmingthanga chuan “Kum 1935 vel hi Lushai boruak kal nat lai vel a ni a, pawl in dinah Mizo tih hmang ngam leh hmanna chang hria an vang khawp mai. Amaherawhchu kan hruaitu hmasa te’n Mizo Zirlai Pawl ti ngata he pawh an lo din hi a lawmawmin an thlir thui hle a ni. Pathian hian Mizo tiin mal min sawma, Lushai emaw Mara emaw Vaiphei emawin mal min sawm lo a ni tih hriat reng tur a ni. Tin, MZP in a kalpui thin rorelna dik chu ‘Lui angin luang se; felna chu Luipui kang ngailo angin luang rawh se’ tih hi hre reng turin MZP te a chah a ni.


Sd/-
(H.LALREMSIAMA)
General Secretary